پرەزيدەنت مۇحتار تىلەۋبەردىنى جاڭا قىزمەتكە تاعايىندادى

استانا. قازاقپارات - پرەزيدەنت قاسىم-جومارت توقايەۆ مۇحتار تىلەۋبەردى مەن دانات مۇسايەۆتى جاڭا قىزمەتتەرگە تاعايىندادى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسىنىڭ جارلىقتارىمەن: مۇحتار بەسكەن ۇلى تىلەۋبەردى قازاقستان رەسپۋبليكاسىنىڭ اۋستريا رەسپۋبليكاسىنداعى توتەنشە جانە وكىلەتتى ەلشىسى، قازاقستان رەسپۋبليكاسىنىڭ ۆەنا قالاسىنداعى حالىقارالىق ۇيىمدار جانىنداعى تۇراقتى وكىلى لاۋازىمىنا تاعايىندالدى؛

قازاقستان رەسپۋبليكاسىنىڭ يسپانيا كورولدىگىندەگى توتەنشە جانە وكىلەتتى ەلشىسى دانات ءومىرباي ۇلى مۇسايەۆ قازاقستان رەسپۋبليكاسىنىڭ اندوررا كنيازدىگىندەگى توتەنشە جانە وكىلەتتى ەلشىسى، ب ۇ ۇ دۇنيەجۇزىلىك تۋريزم ۇيىمى جانىنداعى قازاقستان رەسپۋبليكاسىنىڭ تۇراقتى وكىلى قىزمەتىن قوسا اتقارۋشى بولىپ تاعايىندالدى.

مۇحتار بەسكەن ۇلى تىلەۋبەردى 1968 -جىلى وڭتۇستىك قازاقستان وبلىسىندا دۇنيەگە كەلگەن.

قازاق مەملەكەتتىك ۋنيۆەرسيتەتىن ءتامامداعان.

1993-1996 -جىلدارى - قازاقستان رەسپۋبليكاسى سىرتقى ىستەر مينيسترلىگى ازيا ەلدەرى باسقارماسىنىڭ اتتاشەسى، ءۇشىنشى حاتشىسى. 1996-1999 -جىلدارى - قازاقستان رەسپۋبليكاسىنىڭ كورەياداعى ەلشىلىگىنىڭ ءۇشىنشى، ەكىنشى حاتشىسى. 1999-2000 -جىلدارى - قازاقستان رەسپۋبليكاسى سىرتقى ىستەر مينيسترلىگى ازيا، تاياۋ شىعىس جانە افريكا ەلدەرى دەپارتامەنتىنىڭ ءبىرىنشى حاتشىسى، ەكىجاقتى ىنتىماقتاستىق دەپارتامەنتىنىڭ ءبولىم باستىعى. 2001-2003 -جىلدارى - قازاقستان رەسپۋبليكاسىنىڭ يزرايلدەگى ەلشىلىگىنىڭ كەڭەسشىسى، ق ر ىستەرىنىڭ يزرايلدەگى ۋاقىتشا سەنىمدى وكىلى. 2003-2004 -جىلدارى - قازاقستان رەسپۋبليكاسى سىرتقى ىستەر ۆيتسە-ءمينيسترى.

2004 -جىلدان باستاپ ق ر مالايزياداعى توتەنشە جانە وكىلەتتى ەلشىسى، 2005 -جىلدان باستاپ قازاقستاننىڭ يندونەزياداعى، برۋنەي دارۋسسالامداعى جانە فيليپپين رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقاردى. 2009 -جىلدان باستاپ ق ر-نىڭ جەنەۆاداعى ب ۇ ۇ بولىمشەسىندەگى جانە باسقا دا حالىقارالىق ۇيىمدارداعى تۇراقتى وكىلى، قازاقستاننىڭ شۆەيتسارياداعى توتەنشە جانە وكىلەتتى ەلشىسى، ەلىمىزدىڭ ليحتەنشتەين كىنيازدىگىندەگى جانە ۆاتيكان مەملەكەتىندەگى ديپميسسياسىنىڭ باسشىسى مىندەتىن قوسا اتقارۋشى.

2016 -جىلعى ناۋرىز ايىندا ق ر سىرتقى ىستەر ءمينيسترىنىڭ ءبىرىنشى ورىنباسارى قىزمەتىنە تاعايىندالدى.

2019 -جىلدىڭ قىركۇيەگىندە ق ر سىرتقى ىستەر ءمينيسترى بولدى.

2021 -جىلدىڭ قاڭتارىندا وعان ق ر سىرتقى ىستەر ءمينيسترى – ق ر پرەمەر-ءمينيسترىنىڭ ورىنباسارى لاۋازىمدارى جۇكتەلدى.