ەسكى رەتروكولىكتەر اتىراۋلىقتاردىڭ قىزىعۋشىلىعىن تۋدىردى - فوتو

اتىراۋ. قازاقپارات - رەتروكولىكتەر اتىراۋلىقتاردىڭ قىزىعۋشىلىعىن تۋدىردى، دەپ حابارلايدى قازاقپارات ءتىلشىسى.

اتىراۋداعى سۇلتان بەيبارىس الاڭىندا «West Cars» اۆتوكلۋبىنىڭ ۇيىمداستىرۋىمەن رەتروكولىكتەر كورمەسى ءوتتى.

كورمەگە ەڭ كونە كولىكتەر قويىلدى.

ماسەلەن، نۇرجان تەمىربايدىڭ ماماندىعى - مەحانيك. ول 11 جىل بۇرىن ەسكى كولىكتەردى جاڭالاۋدى قولعا العان.

«بىرنەشە ەسكى كولىكتى قايتا قۇراستىردىم. ونىڭ ىشىندە Toyota موتورى ورناتىلعان BMW، اۆتوجارىسقا ارنالعان سپورتتىق كولىكتەر، موتوتسيكل بار. ەلىمىزدە وتەتىن Gorilla Drift Energy سايىسى ءۇشىن BMW كولىگىن قۇراستىرۋعا 1,5 جىل ۋاقىتىمدى جۇمسادىم»، - دەيدى نۇرجان تەمىرباي.

ول قۇراستىرعان تەحنيكانىڭ قاتارىندا «گاز-24» ماركالى كولىگى بار. بۇل كولىك زاۋىتتان 1963 -جىلى شىعارىلعان.

كولىكتى قايتا قۇراستىرۋ ءۇشىن 5 ملن تەڭگەدەن استام قارجىسىن سالعان.

«بالا كەزىمنەن تەحنيكانى جاقسى كورەمىن. ويىنشىقتاردى بۇزىپ، قايتا قۇراستىراتىن ەدىم. كەيىن كولىك قۇراستىرۋلى قولعا الدىم. ۆولگانى ورال قالاسىنان 300 مىڭ تەڭگە ساتىپ اكەلدىم. ەسكى كولىكتى بويادىم. ءتىپتى كابريولەت كەيپىنە كەلتىرۋ ءۇشىن 11 س م ۇزارتتىم»، - دەيدى نۇرجان تەمىرباي.

ال، يۆان وگۋنكوۆتىڭ كولىگى - 1996 -جىلعى BMW. ونى 2,5 ميلليون تەڭگەگە ساتىپ العان.

«ادەتتە كولىكتىڭ اق پەن قارا تۇرىنە سۇرانىس كوبىرەك بولادى عوي. اتىراۋدا دا اق جانە قارا ءتۇستى كولىكتەر كوپ. ال، مەن كولىگىمنىڭ وزگەشە بولعانىن قالادىم. سول سەبەپتەن قىزىل ءتۇستى كولىككە قىزىقتىم. ءقازىر ءتۇرلى كورمەگە قاتىسىپ ءجۇرمىن»، - دەيدى يۆان وگۋنكوۆ.

ەسكە سالا كەتەلىك، بۇدان بۇرىن اتىراۋلىق وقۋشىلار سۋسابىننىڭ جاڭا ءتۇرىن جاساپ شىعارعانىن حابارلاعان ەدىك.