سوڭعى ەكى جىلدا سابيلەرگە ايزەرە مەن ايالا ەسىمى سيرەك قويىلا باستادى

استانا. قازاقپارات - ءبىرىنشى كرەديت بيۋروسى سوڭعى ەكى جىلدا قىز بالالارعا قويىلعان تانىمال ەسىمدەر قالاي وزگەرگەنىنە تالداۋ جاسادى، دەپ حابارلايدى قازاقپارات.

ماۋسىم ايىندا قىز بالاعا ءجيى قويىلعان 10 ەسىم:

- مەدينا - 551

- ايلين - 482

- ايشا - 452

- اسىلىم - 440

- توميريس - 305

- سافيا - 284

- رايانا - 283

- ايىم - 266

- ءامينا - 257

- ايالا - 246.

ۇلدارعا قاراعاندا قىز بالالار ەسىمىندە 2021 -جىلدان بەرى كوپ وزگەرىس بولا قويعان جوق. بۇل جاعدايدا قازاقستاندىقتاردىڭ قالاۋى سونشالىقتى قۇبىلمالى ەمەستىگىن مويىنداعان ءجون.

2021 -جىلدىڭ ماۋسىمىنداعىداي، مەدينا مەن ايلين ەسىمدەرى رەيتينگتىڭ كوش باسىندا تۇر. ەڭ تومەنگى ورىنداردا - ايىم مەن ءامينا.

دەگەنمەن، ازداعان وزگەرىستەر بارى راس. ايشا ەسىمىنىڭ تانىمالدىعى كۇرت ءوستى - قازىر ول ۇزدىك ۇشتىكتى تۇيىندەپ تۇر (ەكى جىل بۇرىن 4-ورىندا ەدى). توميريس ەسىمى 10-شى ورىننان بىردەن 5-شى ورىنعا كوتەرىلدى.

سونىمەن قاتار، رايانا مەن ايالا قىزدارعا سيرەك قويىلا باستادى. ايزەرە تىزىمنەن مۇلدە جوعالىپ كەتتى. ونىڭ ورنىنا سافيا كەلدى.

جىل باسىنان بەرى 189,5 مىڭ بالا دۇنيەگە كەلدى (98 مىڭ ۇل، 91,5 مىڭ قىز).

ءبىر جىل ىشىندە جاڭا تۋعان نارەستەلەر سانى %4,3 (8,6 مىڭ ادام) تومەندەگەن، ەكى جىلدا بۇل كورسەتكىش %12,3 (26,7 مىڭ ادام) بولدى.

ەسكە سالا كەتەيىك، ءبىز بۇعان دەيىن ماۋسىم ايىندا ۇل بالالارعا ءجيى قويىلعان ەسىمدەرگە شولۋ ۇسىنعان ەدىك.