ەلەنا رىباكينانىڭ مونرەالداعى كەزدەسۋى اۋا رايىنا بايلانىستى كەيىنگە شەگەرىلدى

مونرەال. قازاقپارات - قازاقستاندىق تەننيسشى ەلەنا رىباكينا (WTA رەيتينگىندە 4-ورىن) مونرەالدا (كانادا) ءوتىپ جاتقان تۋرنيردىڭ جارتىلاي فينالىندا رەسەيلىك ليۋدميلا سامسونوۆامەن (18-ورىن) كەزدەسەدى، دەپ حابارلايدى Sports.kz.

بۇل جەكپە-جەك جەكسەنبى كۇنى تاڭەرتەڭ استانا ۋاقىتىمەن 06:30 دا ءوتۋى كەرەك ەدى، ءبىراق 23:30 دا جاۋعان جاڭبىرعا بايلانىستى كەيىنگە شەگەرىلدى.

ەسكە سالايىق، بۇعان دەيىن تۋرنير بارىسىندا قازاقستاندىق تەننيسشى امەريكالىق دجەننيفەر برەديدى (584-ورىن) - 6:7، 7:6، 6:3 - جانە سلوان ستيۆەنستى (38-ورىن) - 6:3، 6:3 جانە رەسەيلىك داريا كاساتكينانى (14-ورىن) 5:7، 7:5، 7:6 ەسەپتەرىمەن جەڭگەن بولاتىن.

بيىلعى مونرەالداعى ءتۋرنيردىڭ جۇلدە قورى 2788468 دوللاردى قۇرايدى. بايقاۋ جەڭىمپازى 454500 دوللار ەنشىلەپ، 900 رەيتينگتىك ۇپايعا يە بولادى.