مەنينگيت اۋرۋىنىڭ بەلگىلەرى قانداي جانە ودان قالاي ساقتانۋ كەرەك - دارىگەر كەڭەسى
دارىگەردىڭ ايتۋىنشا، مەنينگيت پەن ج ر ۆ ي- ءدىڭ بەلگىلەرى ۇقساس، سول سەبەپتى ولاردى شاتاستىرىپ الۋعا بولادى.
«مەنينگيت - بۇل وتە كۇردەلى اۋرۋ، ونى مۇمكىندىگىنشە تەزىرەك انىقتاۋ ماڭىزدى. سوندىقتان تومەندە اتالعان بەلگىلەر انىقتالعان جاعدايدا شۇعىل ەمحاناعا بارۋ نەمەسە جەدەل جاردەم شاقىرۋ قاجەت.
مەنينگيتتىڭ نەگىزگى بەلگىلەرى - باس اۋرۋى بولىپ تابىلادى. ادامنىڭ باسى قاتتى اۋىرىپ، ءتىپتى، اۋىرسىنۋدى باساتىن دارىلەردى قابىلداعان سوڭ دا باس اۋرۋى توقتامادى مۇمكىن. ناۋقاس كوزدىڭ، مويىننىڭ اۋىرسىنۋىنا شاعىمدانادى، ايقىن ينتوكسيكاتسيا پايدا بولادى، ەگەر مەنينگوكوكتسەميا قوسىلسا، تەرىدە گەموروگيالىق بورتپەلەر بولادى. سونىمەن قاتار، اۋرۋدى تەگىس جەرگە جاتىپ، اياقتى تىك كوتەرگەن كەزدە اۋىرسىنۋدان تانۋعا بولادى. مەنينگيت كەزىندە ناۋقاس مۇنى ىستەي المايدى. ەگەر كەيبىرەۋلەرى اياعىن كوتەرسە، مويىن مەن باستىڭ اۋىرسىنۋىن سەزىنۋى مۇمكىن. ءارى قاراي، دەنە تەمپەراتۋراسى 39-40 گرادۋسقا دەيىن جەتۋى مۇمكىن، ميداعى قىسىمنىڭ جوعارىلاۋىنا بايلانىستى قۇسۋ پايدا بولادى»، - دەدى دارىگەر.
مەنينگيت بەلگىلەرىنە - جارىق پەن دىبىسقا سەزىمتالدىق، تابەتتىڭ بولماۋى، السىزدىك تە جاتادى. ال قاۋىپتى بەلگىلەرىنە: قۇرىسۋلار، تىنىس الۋدىڭ قيىنداۋى، سانا-سەزىمنىڭ تومەندەۋى بولىپ تابىلادى. بۇل جاعدايدا شۇعىل مەديتسينالىق كومەك كورسەتۋ قاجەت.
«ەگەر سىزدە وسى بەلگىلەر بايقالسا بولسا، دەرەۋ دارىگەرگە قارالۋ كەرەك. ۋاقىتىلى كومەك بولماعان جاعدايدا اۋىر اسقىنۋلار، ونىڭ ىشىندە مي قىزمەتىنىڭ بۇزىلۋى، سال اۋرۋى، ءتىپتى ولىمگە اكەلۋى مۇمكىن. دارىگەرگە ۋاقىتىلى بارۋ عانا ناۋقاستىڭ ءومىرىن ساقتاپ قالا الادى. ۋاقىتىلى باستالعان ەم ناتيجەسىن بەرەدى»، - دەدى كامشات يبرايەۆا.
ەگەر ناۋقاس ۋاقىتىندا دارىگەرگە جۇگىنبەسە، وندا بىرنەشە كۇن جوعالتۋى مۇمكىن. ەگەر مەنينگيت بەلگىلەرى بار ناۋقاس ۇيدە 2-3 كۇن ۋاقىتتى وتكىزىپ السا، وندا بارلىعى اعىمداعى جاعدايعا بايلانىستى بولادى. ەگەر بەلگىلەر كەنەتتەن پايدا بولسا، وندا ولىمگە اكەلۋى مۇمكىن. بۇل رەتتە كوپ نارسە ۋاقىتقا بايلانىستى.
جالپى، مەنينگوكوكتسەميا - قاندا مەنينگوكوككتىڭ بار ەكەنىن بىلدىرەدى.
دارىگەر اۋرۋدىڭ ماۋسىمى جاز، كۇز مەزگىلدەرىندە بەلسەندى بولاتىنىن اتاپ ءوتتى.
«ءوزىڭىز بەن بالالارىڭىزدى مەنينگيتتەن قورعاۋ ءۇشىن جەكە گيگيەنانىڭ قاراپايىم ەرەجەلەرىن ساقتاۋ كەرەك. ياعني، تاماق ىشەر الدىندا قولىڭىزدى مۇقيات جۋىڭىز، كوكونىستەر مەن جەمىستەردى مۇقيات جۋىڭىز، ولاردى قايناعان سۋمەن شايىڭىز. تەك قايناتىلعان نەمەسە بوتەلكەدەگى سۋدى ءىشىڭىز. تەك رەسمي رۇقسات ەتىلگەن جەرلەردە شومىلىڭىز، شومىلۋ كەزىندە سۋدى جۇتىپ قويماۋعا تىرىسىڭىز، ويتكەنى ۆيرۋس سىرتقى ورتادا ءتوزىمدى جانە سۋدا ۇزاق ۋاقىت ساقتالۋى مۇمكىن. ادامدار كوپ جينالاتىن جەردەن اۋلاق بولىڭىز، بولمەلەردى ءجيى جەلدەتىڭىز»، - دەپ ەسكەرتتى دارىگەر.
سونداي-اق، الماتى قالالىق قوعامدىق دەنساۋلىق ساقتاۋ باسقارماسى اۋرۋدىڭ تارالۋ جولىن حابارلادى.
«ەستەرىڭىزگە سالايىق، اۋرۋ اۋا-تامشى جولىمەن بەرىلەدى. ەگەر وتباسىندا ءبىر ادام جۇقتىرعان بولسا، وندا ەمحاناعا حابارلاما بەرىلەدى جانە بارلىعى تەكسەرىلەدى. ەگەر وتباسى مۇشەلەرىندە سيمپتومدار تابىلماسا، وندا مۇرىن - جۇتقىنشاق جاعىندىسى الىنادى»، - دەپ حابارلادى ۆەدومستۆودا.
ەسكە سالساق، الماتىدا سەروزدى مەنينگيت اۋىرۋىنىڭ ارتىپ وتىرعانىن حابارلاعانبىز
