سيرياداعى جەر سىلكىنىسىندە ءۇيىندى استىنان قۇتقارىلعان نارەستەنىڭ قازىرگى جاعدايى قالاي

دجيندايريس. قازاقپارات - قۇتقارۋشىلار وسى جىلدىڭ اقپانىندا قيراعان ءۇيدىڭ ۇيىندىلەرى اراسىنان قۇتقارعان جاڭا تۋعان نارەستە افرانىڭ عاجايىپ وقيعاسى الەمدەگى كوپتەگەن ادامنىڭ جۇرەگىنەن جول تاپتى.

ءسابي ءۇيىندى استىندا دۇنيەگە كەلىپ، بالاسىن ومىرگە اكەلگەن بويدا قازا تاپقان اناسىنان كىندىگى دە اجىراماعان بولاتىن. ول ءسابيدىڭ قازىر قايدا ەكەنىن قازاقپارات ماتەريالىنان وقي الاسىزدار.

افرا قازىر التى ايلىق جانە ول - ەرەكشە باقىتتى جانە دەنى ساۋ ءسابي.

BBC News مالىمەتىنشە، ونى اپاسى مەن كوكەسى ءوزىنىڭ جەتى بالاسىمەن بىرگە سيريانىڭ دجيندايريس قالاسىندا تاربيەلەپ جاتىر.

كوكەسى حاليل ال-ءساۆاديدىڭ ايتۋىنشا، ءسابي ءالى كىپ-كىشكەنتاي، ءبىراق قازىردىڭ وزىندە اكەسىن ەسكە سالادى، اسىرەسە كۇلكىسى ۇقسايدى.

6- اقپاندا تۇركيانىڭ وڭتۇستىك-شىعىسىندا جانە سيريانىڭ سولتۇستىگىندە 44 مىڭنان استام ادام قازا تاپقان جويقىن جەر سىلكىنىسى بولدى. دجيندايريستەگى جويقىن جەر سىلكىنىسىنەن كەيىن بىردەن افرانىڭ اناسى تولعاتا باستاعان، ال قىز ءۇيىنىڭ قيراعان ۇيىندىلەرى استىندا دۇنيەگە كەلدى. ءسابيدىڭ اناسى، وكىنىشكە قاراي، قۇتقارۋشىلار ولاردى تاپقانعا دەيىن قايتىس بولعان.

قازاقپارات ءسابيدىڭ وتباسى مۇشەلەرى اراسىندا جالعىز ءوزى ءتىرى قالعانىن حابارلاعان بولاتىن. ونىڭ اكەسى، ءتورت اعاسى مەن اپكەسى اناسىمەن بىرگە قازا تاپقان.

افرانىڭ قۇتقارىلعان ۆيدەوسى الەۋمەتتىك جەلىدە جاريالانىپ، تەز تارادى. ءسابيدى اۋرۋحاناعا جەتكىزىپ، وعان ايا ەسىمىن بەرگەن.

بۇل اراب تىلىنەن اۋدارعاندا «عاجاپ» دەگەن ماعىنا بىلدىرەدى.

اۋرۋحاناعا تۇسكەندە قىزدىڭ دەنەسى كەدىر-بۇدىر جانە كوگەرىپ قالعان ەدى، ال تىنىس الۋ جولدارىندا ءۇيىندى شاڭىنىڭ سالدارىنان پروبلەما بولعان. ال، قازىر قىزدىڭ دەنساۋلىعى %100 جاقسى.

افراا اۋرۋحانادا جاتقاندا الەمدەگى مىڭداعان ادام اسىراپ الۋدى ۇسىنعان، سوندىقتان حاليل مەن ونىڭ جۇبايى حالا وزدەرىنىڭ تۋىس ەكەنىن دالەلدەۋىنە تۋرا كەلدى. حالا دنق تەستىن تاپسىرىپ، 10 كۇن كۇتتى.

افرانىڭ وقيعاسى ءبارىنىڭ قىزىعۋشىلىعىن تۋدىرعاندىقتان، حاليل مەن ونىڭ وتباسى قىزدى بىرەۋ ۇرلاپ اكەتىپ قالادى دەپ الاڭداعان. ولار اۋرۋحانا عيماراتىنان شىقپاي، قىزدى كۇنى-ءتۇنى كۇزەتكەن.

دنق اناليز ناتيجەسى حالانىڭ تۋىس ەكەنىن راستادى - ول افرانىڭ اكەسىنىڭ اپكەسى. قىزدى اۋرۋحانادان شىعارىپ الىپ، وعان اناسىنىڭ قۇرمەتىنە افراا دەگەن ەسىم بەرگەن.

حاليل افراا وسكەندە وعان نە بولعانىن ايتىپ، وتباسىنىڭ سۋرەتتەرىن كورسەتۋگە ۋادە بەردى.

قازىر وتباسى ءۇي جالداپ تۇرادى، سەبەبى ولاردىڭ ءۇيى جەر سىلكىنىسىنەن كەيىن قاۋىپتى.

بىرەۋ ونىڭ وتباسىنا ب ا ءا- گە نەمەسە ۇلى بريتانياعا كوشۋگە كومەك ۇسىنعان، ءبىراق حاليل باس تارتقان.

«شىنىمدى ايتسام، مەن ءالى افرانى اكەتىپ قالادى دەپ الاڭدايمىن»، - دەيدى حاليل.

ب ۇ ۇ مالىمەتىنشە، سيريانىڭ سولتۇستىك-باتىسىندا اقپاندا بولعان جەر سىلكىنىسىنەن 4500 گە جۋىق ادام قازا تاپقان.