وزبەكستاننىڭ ەنەرگەتيكا سالاسى توتەنشە جاعداي رەجيمىنە كوشەدى

تاشكەنت. قازاقپارات - كۇزگى-قىسقى كەزەڭدە ەنەرگەتيكالىق جۇيەنىڭ تۇراقتى جۇمىسىن قامتاماسىز ەتۋ ءۇشىن وزبەكستاننىڭ ەنەرگەتيكا سالاسى توتەنشە جۇمىس رەجيمىنە كوشەدى.

بۇل جايىندا وزبەكستان پرەزيدەنتى شاۆكات ميرزيەيەۆ ەنەرگەتيكا ماسەلەلەرىنە ارنالعان بەينەكونفەرەنتسيادا ايتتى، دەپ حابارلايدى قازاقپارات ءتىلشىسى رەسپۋبليكا باسشىسىنىڭ باسپا ءسوز قىزمەتىنە سىلتەمە جاساپ.

جيىن بارىسىندا ەنەرگەتيكالىق كەشەن باسشىلارى مەن اكىمدەرگە جۇيەنىڭ تۇراقتى جۇمىس ىستەۋىن قامتاماسىز ەتۋ بويىنشا ءبىرقاتار تاپسىرما بەرىلدى.

وسىلايشا، ەكىنشى جارتىجىلدىقتا 30 ميلليارد تەكشە مەتر گاز، 41 ميلليارد كيلوۆاتت-ساعات ەلەكتر قۋاتىن ءوندىرۋ، ولاردى تۇتىنۋشىلارعا ۇزدىكسىز جەتكىزۋ، جەراستى گاز قويمالارىنداعى گاز قورىن كەم دەگەندە 3,5 ميلليارد تەكشە مەترگە ۇلعايتۋ تاپسىرىلدى.

سونداي-اق 1- قازانعا دەيىن 1,1 مىڭ شاقىرىم جەلى مەن 402 ترانسفورماتوردى جوندەۋ، كۇزگى- قىسقى كەزەڭدە حالىقتى جانە الەۋمەتتىك نىسانداردى 335 مىڭ توننا سۇيىتىلعان گازبەن ۇزدىكسىز قامتاماسىز ەتۋ مىندەتى قويىلدى.

ودان بولەك، جىل سوڭىنا دەيىن 400 مىڭ توننا بەنزين ءوندىرىپ، 120 مىڭ تونناسىن يمپورتتاۋ قاجەت.

پرەزيدەنت ەنەرگەتيكالىق كەشەن باسشىلىعىنا وبلىس اكىمدەرىمەن جانە سالا باسشىلارىمەن بىرلەسىپ، جىل سوڭىنا دەيىن 3,7 ميلليارد كيلوۆاتت-ساعات ەلەكتر ەنەرگياسىن جانە 2,4 ميلليارد تەكشە مەتر گازدى ۇنەمدەۋدى تاپسىردى.

الەۋمەتتىك نىساندار مەن مەملەكەتتىك مەكەمەلەرگە تاعى 250 مەگاۆاتت كۇن باتارەياسىن ورناتۋدىڭ ماڭىزى ايتىلدى.

«كۇزگى-قىسقى كەزەڭدە ەنەرگەتيكا جۇيەسىنىڭ تۇراقتى جۇمىسىن قامتاماسىز ەتۋ ءۇشىن جاۋاپتى باسشىلار بۇگىننەن باستاپ شۇعىل جۇمىس رەجيمىنە كوشەدى»، - دەدى شاۆكات ميرزيەيەۆ.

بۇعان دەيىن حابارلانعانداي، وزبەكستاندا قاڭتار ايىندا بولعان قاتتى اياز بارلىق جىلدارداعى مەتەورولوگيالىق باقىلاۋلاردىڭ ابسوليۋتتى رەكوردىن جاڭارتتى.

قاتتى سۋىقتا رەسپۋبليكا اۋقىمدى ەنەرگەتيكالىق داعدارىسقا تاپ بولدى.

وزبەكستان باسشىسى قىسقا دايىندىقتىڭ ناشارلىعى ءۇشىن ءبىرقاتار جوعارى لاۋازىمدى شەنەۋنىكتەردى قىزمەتىنەن بوساتتى.