سپورتشىلار ق ر پرەزيدەنتى ءىس باسقارماسىنا قاراستى اۋرۋحانادا تەگىن ەمدەلە الادى

استانا. قازاقپارات – ق ر پرەزيدەنتى ءىس باسقارماسىنا (ق ر پ ءى ب) قاراستى مەديتسينالىق ورتالىعىنىڭ اۋرۋحاناسى مەن «قازاقستان سپورتشىلارى وداعى» رەسپۋبليكالىق قوعامدىق بىرلەستىگى ىنتىماقتاستىق تۋرالى مەموراندۋمعا قول قويدى.

ەندى اۋرۋحانانىڭ سپورتتىق مەديتسينا ورتالىعىندا وتاندىق سپورتشىلار كونسۋلتاتسيالىق-دياگنوستيكالىق جانە حيرۋرگيالىق قىزمەتتەردى تەگىن الا الادى، دەپ حابارلايدى قازاقپارات استانا اكىمدىگى سايتىنا سىلتەمە جاساپ.

«مەموراندۋم ءبىزدىڭ سەرىكتەستىگىمىزدى نىعايتا تۇسەدى. مىنە، وسى ىنتىماقتاستىقتىڭ پايداسىن كورسەتەتىن بىرنەشە نەگىزگى تارماق بار: مامانداندىرىلعان مەديتسينالىق قىزمەتتەر كورسەتۋ، جەكە ءتاسىل، جاراقاتتانۋدىڭ الدىن الۋ، سپورتتىق الەۋەتتى وڭتايلاندىرۋ»، - دەدى ق ر پ ءى ب م و اۋرۋحاناسىنىڭ سپورتتىق مەديتسينا ورتالىعىنىڭ باسشىسى اسقار بايمۇحامەتوۆ.

ءوز كەزەگىندە «قازاقستان سپورتشىلارى وداعى» ر ق ب ءتوراعاسى ازامات قارلىعاشەۆ بۇرىنعى جانە قازىرگى سپورتشىلارعا كومەك كورسەتكەنى ءۇشىن ق ر پ ءى ب مو اۋرۋحاناسىنىڭ باسشىلىعىنا العىس ءبىلدىردى.

«سپورتشىلارىمىز بەن سپورت ارداگەرلەرى ەندى ساپالى مەديتسينالىق كومەك الا الاتىنىنا قۋانىشتىمىن. ەلىمىزدە سپورتشىلار ساپالى ءارى وتە قاجەتتى مەديتسينالىق كومەككە جۇگىنە الماي جاتادى. دەنساۋلىق - ءبىزدىڭ باستى كاپيتالىمىز، ونسىز سپورتشى كارەراسىن ارى قاراي جالعاستىرا المايدى. ال مۇنداي جاعدايلار بىزدە وتە كوپ كەزدەسەدى»، - دەدى ازامات قارلىعاشيەۆ.

بۇل ماسەلەنىڭ وزەكتىلىگىن «قازاقستان سپورتشىلار وداعى» ر ق ب ءتورالقا ءتوراعاسى، وليمپيادا چەمپيونى سەرىك ساپيەۆ تە راستادى.

«كارەراسىنىڭ شىڭىندا سپورتتى تاستاپ كەتكەن ءبىراز سپورتشىنى بىلەمىن.

سپورتشىلار ءۇشىن مۇنداي مۇمكىندىك جاسالعانىنا قۋانىشتىمىن. ەندى سپورتشىلارىمىز كاسىبي جاراقاتتاردىڭ سالدارى ءۇشىن قورىقپاي، ساپالى مەديتسينالىق كومەك الا وتىرىپ، سپورتپەن شۇعىلدانۋدى جالعاستىرا الادى دەپ ۇمىتتەنەمىن»، - دەپ اتاپ ءوتتى ول.

ق ر پ ءى ب مەديتسينالىق ورتالىعى اۋرۋحاناسىنىڭ ديرەكتورى رۋستام البايەۆتىڭ ايتۋىنشا، قازىرگى جانە بۇرىنعى سپورتشىلاردى ەمدەۋ، وڭالتۋ جانە قالپىنا كەلتىرۋ ءۇشىن بارلىق جاعداي جاسالعان.

«سپورتتىق مەديتسينا تەك وپەراتسيالار عانا ەمەس، ەڭ الدىمەن الدىن الۋ شارالارى. اۋرۋحانا بازاسىندا 2023-جىلدىڭ اقپانىندا سپورتتىق مەديتسينا ورتالىعى اشىلدى. ورتالىق دارىگەرلەرى جىل سايىن شەتەلدە بىلىكتىلىگىن ارتتىرادى. جاقىندا دارىگەرلەر يسپانيادا، كيرون ساليۋد اۋرۋحاناسىندا ۇلكەن ليگا فۋتبولشىلارىنا وپەراتسيا جاسايتىن ايگىلى پروفەسسور رامون كۋگاتتىڭ قول استىندا وقىدى. بارلىق ءادىس-تاسىلدەر وسىندا جەتكىزىلدى، بەلسەندى جۇمىس ىستەۋدە. سونداي-اق سپورتتىق مەديتسينا ورتالىعىندا سپورتشىلار كەڭەس الىپ، وپەراتسيا جاساتىپ قانا قويماي، قازاقستاننىڭ كەز كەلگەن ازاماتى ت م ك ك ك جانە م ءا م س شەڭبەرىندە وسى قىزمەتتەردى الا الاتىنىن اتاپ وتكىم كەلەدى»، - دەدى رۋستام البايەۆ.