كريشتيانۋ رونالدۋ ساۋد ارابياسىندا قاماۋعا الىنۋى ىقتيمال

ەر-رياد. قازاقپارات - ساۋد ارابياسىنىڭ «ءال-ناسر» كومانداسىنىڭ شابۋىلشىسى كريشتيانۋ رونالدۋ حريستيان دىنىنە ءتان يشارا جاساعانى ءۇشىن جازالانۋى ىقتيمال، دەپ حابارلايدى قازاقپارات Sports.kz-كە سىلتەمە جاساپ.

«ءال-ناسر» مەن «ال-شورتا» اراب چەمپيوندارىنىڭ كلۋبتىق كۋبوگى اياسىندا ماتچ وتكىزدى. 75- مينۋتتا رونالدۋ پەنالتيدە گول سوقتى جانە بۇل ويىن بارىسىنداعى جالعىز گول بولدى (1:0).

دوپتى قاقپاعا ءدوپ تۇسىرگەننەن كەيىن كريشتيانۋ وڭ قولىمەن حريستيان دىنىنە ءتان شوقىنۋ يشاراسىن جاسادى. وسى ارەكەتى ءۇشىن ول جازاعا تارتىلىپ، ءتىپتى قاماۋعا الىنۋى مۇمكىن. سەبەبى ساۋد ارابياسىندا حريستياندىققا قاتىستى كەز كەلگەن ىم-يشاراعا تىيىم سالىنعان.

پورتۋگاليالىق ويىنشى قامالۋى ىقتيمال دەگەن قاۋىپ بار، ءبىراق جەرگىلىكتى بيلىك ونى جازالامايدى دەپ كۇتىلۋدە. الايدا كلۋب باسشىلىعى سوگىس بەرۋى مۇمكىن دەگەن بولجام جاسالىپ جاتىر.