كيىكتىڭ ءمۇيىزىن زاڭسىز ساقتاعان ەكى اتىراۋلىق سوتتالدى
اتىراۋ قالاسىنىڭ 2№ سوتىندا كيىك ءمۇيىزىن زاڭسىز يەمدەنىپ، ساقتاپ، تاسىمالداعانى ءۇشىن ەكى كۇدىكتىگە قىلمىستىق ءىس قارالدى. كۇدىكتىلەرگە ق ر قىلمىستىق كودەكستىڭ 339-بابىنىڭ 3-بولىگىنىڭ 2-تارماعىمەن ايىپ تاعىلعان.
«بيىلعى 2- ناۋرىزدا ك. جانە ز. ءولى كۇيدە جاتقان كيىكتەردىڭ 2 مىڭنان استام ءمۇيىزىن كەسىپ العان. كەيىن ك. -نىڭ اتىراۋ قالاسىنداعى تۇرعىلىقتى مەكەنجايىنا اكەلىپ، زاڭسىز ساقتاعان. ال 4 ناۋرىزدا ك. -نىڭ ءۇيىن ءتىنتۋ كەزىندە جوعارىدا كورسەتىلگەن كيىك مۇيىزدەرى تابىلعان. كۇدىكتىلەر قىلمىستىق ارەكەتتەرىمەن مەملەكەتكە 6 ميلليارد تەڭگەدەن استام مولشەردە اسا ءىرى زالال كەلتىرگەن» ، - دەپ 2№ سوتتىڭ باسپا ءسوز قىزمەتى.
سوتتالۋشىلاردىڭ كىناسى ءتىنتۋ حاتتاماسىمەن، زاتتاي دالەلدەمەلەرمەن، بەينەجازبالارمەن، سوت-بيولوگيالىق جانە تاۋارتانۋ ساراپتامالارىنىڭ قورىتىندىلارىمەن دالەلدەنگەن.
پروكۋرور سوتتالۋشى ك. -عا 8 جىل، ال، ز. -عا 7 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇراعان.
سوت ك. جانە ز. -نى ق ر قىلمىستىق كودەكسىنىڭ 339-بابىنىڭ 3-بولىگىنىڭ 2-تارماعىمەن كىنالى دەپ تانىدى.
«ك. -عا 7 جىل، ز. -عا 4 جىل مەرزىمگە باس بوستاندىعىنان ايىرۋ جازاسى تاعايىندالدى. سوتتالۋشىلاردان ورتاق ۇلەستە مەملەكەت پايداسىنا 6 ميلليارد تەڭگەدەن استام مولشەردە زالال وندىرىلەدى»، - دەپ ءمالىم ەتتى سوتتىڭ باسپا ءسوز قىزمەتى.
سوت ۇكىمى زاڭدى كۇشىنە ەنگەن جوق.
ەسكە سالا كەتەلىك، بۇدان بۇرىن اتىراۋدا تۇرعىن ۇيدەن 2,5 مىڭعا جۋىق اقبوكەن ءمۇيىزى تاركىلەنگەنىن جازعان بولاتىنبىز.
