قانداي سۋسىن باۋىر قاتەرلى ىسىگى قاۋپىن ارتتىرادى؟

استانا. قازاقپارات - ءبىزدىڭ اعزامىزعا زيان كەلتىرەتىن تەك ءسپيرتتى سۋسىندار ەمەس. جاڭا زەرتتەۋدىڭ اۆتورلارى قانتى كوپ سۋسىندار مەن باۋىر اۋرۋى جانە قاتەرلى ىسىگى اراسىندا بايلانىس بارىن انىقتاعان.

ولاردىڭ جۇمىستارىنىڭ ناتيجەلەرى Jama Network Open باسىلىمىندا جاريالاندى، - دەپ حابارلايدى Express پورتالى.

باۋىر قاتەرلى ىسىگىنىڭ بەلگىلەرى قانداي؟

باۋىر قاتەرلى ىسىگىنىڭ بەلگىلەرىنە مىنالار جاتادى:

تەرىنىڭ نەمەسە كوز اعىنىڭ سارعايۋى؛

تەرىنىڭ قىشۋى؛

ءزاردىڭ قويۋ ءتۇسى؛

تابەتتىڭ جوعالۋى؛

قاتتى شارشاڭقىلىق؛

ءىشتىڭ وڭ جاق جوعارى بولىگىندە ىسىنگەندىك؛

جۇرەك اينۋ؛

سەبەپسىز ارىقتاۋ؛

كەنەتتەن مۇرىن قاناۋ؛

ۇنەمى ءىشتىڭ كەبۋى.

عالىمدار كومانداسى 98786 ايەلدىڭ مالىمەتتەرىنە اناليز جاساعان. ولار قاتىسۋشىلار جايلى اقپاراتتى 1993-جىلدان 1998-جىلعا دەيىنگى ارالىقتا 40 كلينيكالىق سىناق تۇسكەن Women's Health Initiative زەرتتەۋىنەن العان. سول كەزدە زەرتتەۋگە 50-79 جاس ارالىعىنداعى ايەلدەر قاتىسقان. ولاردىڭ ءارقايسىسىنان وزدەرىنىڭ سۋسىن ءىشۋ ادەتتەرى جايلى ايتىپ بەرۋلەرىن سۇراعان. ايەلدەر الكوگولدى ەمەس سۋسىنداردى، قانتى بار سۋسىنداردى جانە جەمىس شىرىندارىن قانشالىقتى كوپ ىشەتىنىن ايتۋ كەرەك بولدى. شامامەن %6,8 (6692) قاتىسۋشى كۇندە ءبىر نەمەسە بىرنەشە پورتسيا ءتاتتى سۋسىن ىشەتىنىن ايتقان. سونداي-اق %13,1 قاتىسۋشى (8506 ادام) كۇندە ءبىر نەمەسە بىرنەشە جاساندى حوش يىستەندىرگىشى بار سۋسىن ىشكەن.

عالىمدار 20,9 جىلدا باۋىر قاتەرلى ىسىگىنىڭ 207 جاعدايىن انىقتاعان. وعان قوسا، سوزىلمالى باۋىر اۋرۋىمەن بايلانىستى 148 ءولىم جاعدايى WHI قاتىسۋشىلارى بولىپ شىققان.