قازاقستاندا كەڭسە قاعازىن شەتەلدىك كومپانيالاردان ساتىپ الۋعا تىيىم سالىنۋى مۇمكىن

استانا. قازاقپارات - «اشىق ن ق ا» پورتالىندا «ۇلتتىق رەجيمنەن الىپ قويۋدى بەلگىلەۋدىڭ كەيبىر ماسەلەلەرى تۋرالى» ق ر ۇكىمەتى قاۋلىسىنىڭ جوباسى جاريالاندى.

وسىعان وراي ەلىمىزدە كەڭسە قاعازىن شەتەلدىك كومپانيالاردان ساتىپ الۋعا تىيىم سالىنۋى مۇمكىن، دەپ حابارلايدى قازاقپارات.

كەڭسە قاعازىن جەتكىزەتىن شەتەلدىك كومپانيالاردى مەملەكەتتىك ساتىپ الۋعا قاتىسۋىن شەكتەۋ ىشكى نارىقتى يمپورتتان قورعاۋعا جانە وتاندىق تاۋار وندىرۋشىلەردى قولداۋعا مۇمكىندىك بەرەدى.

بۇل باستامانى «اتامەكەن» ۇ ك پ جانە قازاقستان قاپتاماشىلار قاۋىمداستىعى كوتەردى.

«اتامەكەن» ۇكپ وڭدەۋ ونەركاسىبى دەپارتامەنتىنىڭ باسقارۋشى ديرەكتورى المات اسقاردىڭ ايتۋىنشا، كەيىنگى ءۇش جىلدا قازاقستان جەكە وندىرىستەردى قۇرۋ بويىنشا بەلسەندى جۇمىس ىستەپ جاتقانىنا قاراماستان، قازىرگى كەزدە مەملەكەتتىك جانە كۆازيمەملەكەتتىك سەكتوردىڭ ساتىپ الۋىنا شەتەلدىك كومپانيالار كوپتەپ قاتىسىپ جاتىر.

«وسى جىلدىڭ ءتورت ايى ىشىندە جازۋ، باسپا نەمەسە باسقا دا گرافيكالىق ماقساتتارعا ارنالعان قاعاز بەن كارتوننىڭ يمپورتى اقشالاي ماندە 2022-جىلدىڭ انالوگتىق كەزەڭىمەن سالىستىرعاندا %51,6 عا ءوسىپ، 6,3 ميلليارد تەڭگە بولدى. ال زاتتاي ماندە %18,5 عا ۇلعايىپ، 10,9 توننا بولعان»، - دەدى سپيكەر.

سپيكەر قاعازدى جەتكىزەتىن نەگىزگى كوزدەر ءىرى شەتەلدىك كومپانيالاردىڭ كوتەرمە ساتۋشىلارى مەن ديستريبيۋتەرلەرى ەكەنىن ايتتى. بۇل كومپانيالار الەمدەگى گەوساياسي احۋالعا بايلانىستى قازاقستان نارىعىنا نازار اۋدارا باستاعان. قازاقستاندا ءوندىرىسى جوق، جابدىق پەن پەرسونالعا شىعىن شىعارماي شەتەلدىكتەر كونكۋرستا دەمپينگ كورسەتىپ، تومەن باعا ۇسىنا الادى. وسىلايشا وتاندىق وندىرۋشىلەر تاپسىرىستان، سايكەسىنشە جۇمىستان قاعىلىپ وتىر.

قازىر قازاقستاندا استانا، الماتى، شىمكەنت جانە پەتروپاۆل قالالارىندا كەڭسە قاعازىن وندىرەتىن كاسىپورىندار تىركەلگەن جانە بەلسەندى جۇمىس ىستەپ جاتىر. كاسىپورىنداردىڭ جيىنتىق وندىرىستىك قۋاتى جىلىنا 23 مىڭ توننادان اسادى. بۇل رەتتە 2022-جىلى ساتىپ الۋدىڭ جالپى كولەمى شامامەن 15 مىڭ توننا بولدى.

«A3 جانە A4 فورماتىنداعى كەڭسە تەحنيكاسى ءۇشىن قاعاز ءوندىرۋشى وتاندىق كاسىپورىندار ساتىپ الۋدىڭ قاجەتتى كولەمىن تولىق قامتۋعا، كەرەك بولسا، وندىرىستىك قۋاتتى ارتتىرۋعا دايىن. سونىمەن قاتار وتاندىق وندىرۋشىلەر بيۋجەتكە سالىق اۋدارىمدارىن قامتاماسىز ەتەدى. يمپورت ازايادى. سونداي-اق ءبىزدىڭ كومپانيالار دايىن ءونىم ەكسپورتىن جولعا قويۋعا دايىن»، - دەپ اتاپ ءوتتى قازاقستاننىڭ قاپتاماشىلار قاۋىمداستىعىنىڭ ءتوراعاسى باتىربەك اۋباكىروۆ.