قورعانىس مينيسترلىگى دۇرلىكپەۋدى ەسكەرتتى: ەل اۋماعىندا جاۋىنگەرلىك تەحنيكا تاسىمالدانادى

استانا. قازاقپارات - اسكەرلەردى دايارلاۋ جوسپارى شەڭبەرىندە قارۋلى كۇشتەردە جاۋىنگەرلىك دايارلىق ساباقتارى وتكىزىلەدى، دەپ حابارلايدى قازاقپارات قورعانىس مينيسترلىگىنە سىلتەمە جاساپ.

«بولىمشەلەر پراكتيكالىق وقۋ- جاۋىنگەرلىك مىندەتتەردى ورىنداۋ ءۇشىن جاۋىنگەرلىك تەحنيكامەن مارش جاساپ، تەمىرجول كولىگىمەن ەلىمىزدىڭ ءار وڭىرىندەگى پوليگوندارعا جەتكىزىلەدى.

پوليگونداردا تاكتيكالىق جاتتىعۋلار مەن اتىستار، كۇندىز دە، تۇندە دە وتكىزىلەدى. بۇل رەتتە اسكەري قىزمەتشىلەردىڭ ماقساتقا ساي تاپسىرمالاردى بەلگىلەنگەن مەرزىمدە ورىنداۋى، بولىمدەردىڭ ۇيلەسىمدىلىگى مەن قابىلەتى، سونداي-اق كومانديرلەردىڭ باعىنىستى جانە سەنىپ تاپسىرىلعان بولىمشەلەردى باسقارا ءبىلۋى باعالانادى.

وسىعان بايلانىستى، ازاماتتاردان تاراتىلعان قاۋەسەتتەرگە ءمان بەرمەي، تەك رەسمي اقپارات كوزدەرىنە سەنۋدى سۇرايمىز»، - دەلىنگەن رەسمي حابارلامادا.