مينيستر بالالاردى قۇتقارامىن دەپ قازا تاپقان ازاماتتىڭ وتباسىن ماراپاتتادى

قونايەۆ. قازاقپارات - توعانداعى سۋعا باتىپ بارا جاتقان ەكى بالانى قۇتقارىپ، تاعى ەكەۋىن الىپ شىعۋ ءۇشىن قايتا ۇمتىلعانىندا ءوزى ورالماي قالعان الماتى وبلىسىنىڭ تۇرعىنى راۋان ءبىرقۇرمانوۆتىڭ وتباسىنا مەدال تابىستالدى، دەپ حابارلايدى قازاقپارات توتەنشە جاعدايلار مينيسترلىگىنە سىلتەمە جاساپ.

وقيعا 2015 -جىلعى 7-شىلدەدە بولعان. الماتى وبلىسىنىڭ تۇرعىنى راۋان ءبىرقۇرمانوۆ وتباسىمەن قاراساي اۋدانى يسايەۆو اۋىلىنىڭ جانىنداعى توعانعا بارعان. وسى ۋاقىتتا 10-12 جاستاعى بالالار اتا-انالارىنىڭ قاراۋىنسىز سۋعا شومىلىپ جۇرەدى. كەنەتتەن ول بالالاردىڭ سۋعا باتا باستاعانىن بايقاپ قالادى. ويلانباستان سۋعا سەكىرگەن ازامات ۇل مەن قىزدى شىعارىپ الادى. مۇنان سوڭ تاعى ەكى بالانى قۇتقارۋعا تىرىسقان. الايدا، ولارعا قاراي سۇڭگىپ كەتكەن ول ءوزى قايتىپ ورالعان جوق.

توتەنشە جاعدايلار ءمينيسترى سىرىم ءشارىپحانوۆ الماتى قالاسىنا جۇمىس ساپارى كەزىندە راۋان ءبىرقۇرمانوۆتىڭ وتباسىمەن كەزدەسىپ، «سۋعا باتقانداردى قۇتقارعانى ءۇشىن» مەدالىن تابىستادى.