كىمگە جانە قانداي جاعدايدا كوپ جۇرۋگە بولمايدى؟ دارىگەر جاۋابى

الماتى. قازاقپارات - ءجۇرۋ - فيزيكالىق بەلسەندىلىكتىڭ ەڭ قاراپايىم جانە قولجەتىمدى ءتۇرى. جاياۋ ءجۇرۋدىڭ دەنساۋلىققا پايداسىن ۇسىنامىز.

كوپتەگەن زەرتتەۋلەرگە ساي، جاياۋ ءجۇرۋدىڭ دەنساۋلىققا پايداسى زور. ءبىرىنشى كەزەكتە، ول يممۋنيتەتتى قاتايتادى. سونداي-اق كوپ جاياۋ جۇرەتىن ادامداردىڭ زات الماسۋى جاقسى جۇمىس ىستەيدى.

ءجۇرۋ دەنساۋلىقتى قالاي جاقسارتادى:

1. جۇرەك پەن قان تامىرلاردى جاقسارتادى، سونىڭ سەبەبىنەن ادامنىڭ قان قىسىمى قالىپتى بولادى؛

2. قانت ديابەتىنىڭ دامۋ قاۋپىن ازايتادى؛

3. ارتىق سالماقتان ارىلۋعا كومەكتەسەدى. جۇرەك سوعۋ جيىلىگىنىڭ ارتۋىنا بايلانىستى قاناعىم كۇشەيەدى، ال بۇلشىقەتتەردى وتتەگىمەن قورەكتەندىرۋ قارقىندى بولا تۇسەدى. ءجۇرۋ كەزىندە تىنىشتىق جاعدايىنداعىعا قاراعاندا كالوريا 5 ەسە كوپ جاعىلادى؛

4. بۇلشىقەتتەردى تونۋسقا كەلتىرەدى، بايلامداردى جاتتىقتىرادى، ۇيقىنى جاقسارتادى؛

5. كۇيزەلىس پەن مازاسىزدىقتان ارىلتادى، كوڭىل كۇيدى جاقسارتادى، كۇش بەرەدى؛

6. مي جۇمىسىنىڭ تيىمدىلىگىن ارتتىرادى. نەيروندىق بايلامدار قاتايعان كەزدە ادامنىڭ اقىل- وي قابىلەتتەرى جاقسارادى.

كىمدەرگە جانە قانداي جاعدايدا كوپ جۇرۋگە بولمايدى؟

جاياۋ ءجۇرۋ دەنساۋلىققا پايدالى بولعانىمەن، ش ج ق «وتباسىلىق مەديتسينا ورتالىعىنىڭ» جالپى تاجىريبەلىك دارىگەرى سەيتماعۇلوۆا اقبوتانىڭ ايتۋىنشا، كەي جاعدايلاردا وعان قارسىكورسەتىلىم بار.

«بىرىنشىدەن، ادامعا جاقىندا وتا جاسالعان بولسا، وعان ۋاقىتشا ۇزاق جاياۋ ءجۇرۋ تىيىم سالىنادى. سەبەبى فيزيكالىق بەلسەندىلىك تىگىستىڭ اشىلىپ كەتۋ قاۋپىن ارتتىرۋى، ونىڭ جازىلۋىن باياۋلاتۋى جانە اۋىرۋدى كۇشەيتۋى مۇمكىن. ەكىنشىدەن، سوزىلمالى اۋرۋلار اسقىنعان كەزدە، سونىڭ ىشىندە جوعارى قان قىسىمى نەمەسە جۇقپالى پروتسەستەر كەزىندە ۇزاق جۇرۋگە بولمايدى. ۇشىنشىدەن، قيمىل- تىرەك اپپاراتىنىڭ بۇزىلۋى كەزىندە پروبلەما ۋشىعىپ كەتپەس ءۇشىن ۇزاق جۇرۋمەن اينالىسپاعان ءجون»، - دەپ كەڭەس بەردى سەيتماعۇلوۆا اقبوتا.

كۇنىنە قانشا ۋاقىت ءجۇرۋ كەرەك؟

دۇنيەجۇزىلىك دەنساۋلىق ساقتاۋ ۇيىمى (د د س ۇ) ەرەسەكتەرگە اپتاسىنا 150 دەن 300 مينۋتقا دەيىن ءجۇرۋدى ۇسىنادى. سونداي- اق ءجۇرۋدى باسقا دا اەروبتى جۇكتەمەمەن، مىسالى، ءجۇزۋ، بي نەمەسە جۇگىرۋمەن الماستىرۋعا بولادى.

كۇندە جاياۋ ءجۇرۋدى قالاي ادەتكە اينالدىرۋعا بولادى؟

1. سەرۋەندەۋگە ارنالعان جاعىمدى جەر تابىڭىز. مىسالى، ورمان، ساياباق نەمەسە وزەن جاعاسى. تابيعات كوڭىل كۇيىڭىزگە، حال-جاعدايىڭىزعا جاعىمدى اسەر ەتەدى.

2. جۇرۋگە ىڭعايلى اياق كيىم مەن سپورتتىق كيىم ساتىپ الىڭىز.

3. سۇيىكتى مۋزىكاڭىزدى نەمەسە اۋديوكىتاپ قوسىپ قويىڭىز.

4. ينتەرنەتتەن قالاي دۇرىس ءجۇرۋ كەرەگى جانە قالاي دۇرىس تىنىس الۋ كەرەگى جايلى ۆيدەولار قاراڭىز. دۇرىس تەحنيكا دەنەگە تۇسەتىن كۇشتى ازايتۋعا كومەكتەسەدى.

5. جىلدامدىقتى ۋايىمداماڭىز. ءوز ىرعاعىڭىزدا ءجۇرۋ جانە سەرۋەننەن ءلاززات الۋ ماڭىزدى.

6. قاسىڭىزعا ادام تابىڭىز. دوسىڭىزبەن نەمەسە جاقىن ادامىڭىزبەن بىرگە ءجۇرۋ ونىمەن قارىم- قاتىناسىڭىزدىڭ قاتايۋىنا ىقپال ەتەدى جانە موتيۆاتسيانىڭ جوعالماۋىنا كومەكتەسەدى.

دارىگەر سەيتماعۇلوۆا اقبوتا جۇكتەمەنى بىرتىندەپ قوسۋعا كەڭەس بەردى.

«كۇنىنە 20-30 مينۋت جۇرۋدەن باستاڭىز. ۋاقىت وتە ۋاقىتتى جانە جۇرەتىن ارا- قاشىقتىقتى ارتتىرا بەرىڭىز. مىسالى، جۇمىسقا جاياۋ بارىپ، جاياۋ كەلىڭىز. ەگەر جۇمىسىڭىز قاتتى الىس بولسا، بىرنەشە ايالداما بۇرىن ءتۇسىپ قالىپ، ارى قاراي جاياۋ بارىڭىز. جۇمىستا تۇسكى اس كەزىندە دالاعا شىعىپ، ازداپ ءجۇرىپ قايتىڭىز»، - دەدى ول.

كۇنىنە قانشا قادام جاساۋ كەرەك؟

قازىر كوپشىلىك ۇيالى تەلەفونعا قادام ساناۋشى قوسىمشا جازىپ الىپ، كۇندەلىكتى قادامىن باقىلاپ جۇرەدى. كوپ جەردە كۇنىنە 10000 قادام جاساۋ جانە جىلدام ءجۇرۋ كەرەگى جازىلادى. بۇل قانشالىقتى راس؟

European Journal of Preventive Cardiology جۋرنالىندا جاريالانعان جاڭا زەرتتەۋ بويىنشا، ءولىم قاۋپىن ازايتۋ ءۇشىن كۇنىنە 4000-5000 قادام جاساۋ جەتكىلىكتى.

لودز مەديتسينالىق ۋنيۆەرسيتەتىنىڭ پروفەسسورى ماسەي باناچ جانە ونىڭ ارىپتەستەرى وسى تاقىرىپقا ارنالعان الدىڭعى 17 عىلىمي جۇمىستىڭ دەرەكتەرىن جيناقتاپ، تالداۋ جۇرگىزدى. ولار بارلىعى 227 مىڭعا جۋىق ادامدى (ورتاشا جاس - 64 جاس) قامتىدى، ولار قادامدار سانى مەن جۇرەك- قان تامىرلارى اۋرۋلارى مەن باسقا سەبەپتەردەن بولاتىن ءولىم قاۋپى اراسىنداعى بايلانىستى باعالادى.

بۇل جۇمىس تاۋلىگىنە ورتاشا قادامداردى 500-گە ارتتىرۋ جۇرەك- قان تامىرلارى پروبلەمالارىنان بولاتىن ءولىم قاۋپىن %7 عا، ال 1000 قادامعا ارتتىرۋ كەز كەلگەن سەبەپتەردەن بولاتىن ءولىم قاۋپىن %15 عا تومەندەتەتىنىن كورسەتتى. الايدا جاياۋ ءجۇرۋدىڭ پايداسى بۇرىن ويلاعاننان الدەقايدا از قادامنان باستالادى.

بارلىق سەبەپتەردەن بولاتىن ءولىم-ءجىتىمنىڭ تومەندەۋىنە ايتارلىقتاي اسەر ەتۋ - 3967 قادامدا، ال جۇرەك-قان تامىرلارى اۋرۋلارىنىڭ ازايۋى 2337 قادامدا بايقالعان.