بۇلىكشىلەر بيلىكتەن شەتتەتىلگەن پرەزيدەنتتى ولتىرەمىز دەپ قورقىتتى

نيامەي. قازاقپارات - باتىس افريكا ەلدەرىنىڭ ەكونوميكالىق قاۋىمداستىعى (ەكوۆاس) نيگەر شەكاراسىنا جاقىن جەردە رەزەرۆتەگى اسكەرلەردى قوسۋدى تالاپ ەتتى.

قاۋىمداستىق شەكارالاردى جابۋ، ساپارلارعا قاتاڭ تىيىم سالۋ جانە كونستيتۋتسيالىق ءتارتىپتى قالپىنا كەلتىرۋگە كەدەرگى جاسايتىن ادامدار اكتيۆتەرىن توقتاتۋ شارالارىن قابىلدايتىنىن مالىمدەدى، دەپ حابارلايدى قازاقپارات euronews.com-عا سىلتەمە جاساپ.

بۇرىن نيگەردەگى بيلىكتى باسىپ العان بۇلىكشىلەر كورشى مەملەكەتتەردىڭ اسكەري ارالاسۋى جاعدايىندا بيلىكتەن شەتتەتىلگەن پرەزيدەنت موحامەد بازۋمدى ولتىرەمىز دەپ قورقىتتى.

باتىس اقپارات اگەنتتىكتەرىنىڭ حابارلاۋىنشا، بۇلىكتى ۇيىمداستىرۋشىلار مۇنداي ەسكەرتۋدى 7-تامىزدا نيگەرگە كەلگەن ا ق ش مەملەكەتتىك حاتشىسى ءبىرىنشى ورىنباسارىنىڭ م. ا. ۆيكتوريا نۋلاندقا جاسادى. ول ەلدەگى دەموكراتيالىق ءتارتىپتى قالپىنا كەلتىرۋ جولىن ۇسىندى، ءبىراق بۇلىكشىلەر «ونشا قىزىعۋشىلىق تانىتپادى».

ەسكە سالا كەتسەك، نيگەردەگى اسكەريلەر ۇلتتىق تەلەارنا ارقىلى پرەزيدەنت موحامەد بازۋمدى بيلىكتەن كەتىرگەنىن جاريالادى.

ولار سونداي-اق كونستيتۋتسيا مەن بارلىق مەملەكەتتىك ينستيتۋتتار جۇمىسى توقتاتىلىپ، ەلدىڭ باتىس افريكاداعى شەكارالارى جابىلادى دەپ حابارلادى. تەلەديداردان گەنەرال-پولكوۆنيك امادۋ ابدۋراحمان سويلەدى.

«ءبىز، قورعانىس جانە قاۋىپسىزدىك كۇشتەرى وزدەرىڭىز بىلەتىن رەجيمدى تاقتان تايدىرۋعا بەل بايلادىق»، - دەدى گەنەرال تەلەديدار ارقىلى سويلەگەن سوزىندە. - بۇل - قاۋىپسىزدىك سالاسىنداعى جاعداي ناشارلاپ، ەكونوميكالىق جانە الەۋمەتتىك باسقارۋدىڭ تومەندەۋىنە بايلانىستى قابىلدانعان شەشىم». ونىڭ ايتۋىنشا، مينيسترلىك باسشىلارى كۇندەلىكتى مىندەتىن اتقارا بەرەدى.

«بارلىق سىرتقى سەرىكتەستەردەن ماسەلەگە ارالاسپاۋدى سۇرايمىز. جاعداي تۇراقتانعانشا تەڭىز جانە اۋە شەكارالارى جابىلادى»، - دەدى ول.

افريكانىڭ نيگەر ەلىندەگى وقيعالار الەمدىك بۇقارالىق اقپارات قۇرالدارىنىڭ نازارىندا. قىزىعۋشىلىقتىڭ ارتۋى نيگەردىڭ ەۋروپالىق وداق يمپورتتايتىن ۋراننىڭ ۇلكەن قورىنا، سونداي-اق ساحەل ايماعىنداعى جالپى قاۋىپسىزدىك جاعدايىنا بايلانىستى. تولىعىراق قازاقپارات ح ا ا- نىڭ تالداۋ ماتەريالىنان وقي الاسىز.