بالالاردىڭ ەستۋ قابىلەتى ۋاقىت وتە كەلە جوعالۋى مۇمكىن - دارىگەر

الماتى. قازاقپارات - اۋديولوگيالىق سكرينينگ جاڭا تۋعان نارەستە، كىشكەنتاي بالالاردىڭ ەستۋ قابىلەتىنىڭ بۇزىلۋىن دەر كەزىندە انىقتاۋ، مۇگەدەكتىككە اكەلەتىن اۋرۋدى ەرتەرەك ەمدەۋ جانە الدىن الۋ ماقساتىندا جۇرگىزىلەدى.

بۇل تۋرالى الماتى قالاسى №36-قالالىق ەمحانانىڭ پەدياتر دارىگەرى ءمولدىر دوسجان ايتتى، دەپ حابارلايدى قازاقپارات ءتىلشىسى.

سپيكەردىڭ ايتۋىنشا، جاڭا تۋعان نارەستەلەر مەن 6 جاسقا دەيىنگى بالالار اۋديولوگيالىق سكرينينگتەن وتەدى.

«ەستۋ پاتولوگياسى بالانىڭ دامۋىنا تەرىس اسەر ەتەدى. اتاپ ايتقاندا، سويلەۋ مەن ءتىل دامۋىنىڭ كەشىگۋىنە، الەۋمەتتىك، ەموتسيونالدىق جانە كوممۋنيكاتسيالىق داعدىلاردىڭ قالىپتاسۋىنىڭ بۇزىلۋىنا، كوگنيتيۆتى دامۋدىڭ كەشىگۋىنە جانە تومەندەۋىنە اكەلەتىن تۋا بىتكەن نەمەسە ەرتە ەستۋ قابىلەتىنىڭ جوعالۋىنا اكەلەدى. تەرىس اسەردىڭ اۋىرلىعى ەستۋ قابىلەتىنىڭ بۇزىلۋىنىڭ ءتۇرى مەن دارەجەسىنە، ەستۋ قابىلەتىنىڭ جوعالۋىنىڭ باستالۋ جاسىنا قاراي ءتۇرلى بولۋى مۇمكىن.

ەستۋ قابىلەتى ناشار بالالاردى ەستۋ ورتاسىنا بىرىكتىرۋدىڭ ساتتىلىگى كوبىنە ەستۋ قابىلەتىنىڭ جوعالۋى قانشالىقتى ەرتە انىقتالعانىنا بايلانىستى. ەگەر تۇزەتىلمەگەن ەستۋ قابىلەتىنىڭ جوعالۋى ءتىلدى مەڭگەرۋدىڭ ماڭىزدى كەزەڭىندە بولسا، وندا بالالار قابىلداۋ جانە ەكسپرەسسيۆتى سويلەۋدىڭ تەرەڭ بۇزىلۋىن، ورەسكەل دامۋ كەشىگۋلەرىن باستان وتكەرۋى مۇمكىن. ەستۋ قابىلەتىنىڭ بۇزىلۋىن دەر كەزىندە دياگنوستيكالاۋ جانە كومەك كورسەتۋ باعدارلاماسىن باستاۋ ەستۋ قابىلەتىنىڭ جوعالۋىنىڭ جاعىمسىز سالدارىن بارىنشا ازايتۋدىڭ قاجەتتى شارتى بولىپ تابىلادى»، - دەدى دارىگەر.

ول ەستۋ قابىلەتى بۇزىلعان بالالاردىڭ شامامەن جارتىسىندا ەستۋ قابىلەتىنىڭ جوعالۋى مەن كەرەڭدىكتىڭ دامۋى ءۇشىن ايقىن قاۋىپ فاكتورى جوق ەكەنىن ايتتى. ەستۋ قابىلەتىنىڭ جوعالۋى اتا- انا مەن مامانداردىڭ نازارىن اۋدارماي، بىرتە- بىرتە پايدا بولۋى مۇمكىن. بۇل نەوناتالدى كەزەڭنەن باستاپ بالالاردى جاپپاي تەكسەرۋ قاجەت ەكەنىن كورسەتەدى.

جاڭا تۋعان نارەستەگە ارنالعان اۋديولوگيالىق سكرينينگتىڭ ءبىرىنشى كەزەڭى ءومىرىنىڭ العاشقى 24-72 ساعاتىندا جۇزەگە اسىرىلادى. ەكىنشى كەزەڭى بالا 3 اي، 1 جاس، 2 جاس، 3 جاس، 6 جاسقا جەتكەندە جۇرگىزىلەدى.