دەپۋتاتتار اباي ولەڭدەرىن وقىدى - ۆيدەو

استانا. قازاقپارات - اباي كۇنىنە وراي ءماجىلىستىڭ ءبىر توپ دەپۋتاتى ۇلى اقىننىڭ شىعارماشىلىعىنان ءۇزىندى وقىدى، دەپ حابارلايدى قازاقپارات ءتىلشىسى.

ماسەلەن Respublica پارتياسىنىڭ ءتوراعاسى ايداربەك قوجانازاروۆ ۇلى اقىننىڭ ەڭبەك، شارۋاشىلىق تاقىرىبىنداعى «تۇبىندە باياندى ەڭبەك ەگىن سالعان» ولەڭىن ۇلتتىق كيىم كيىپ، ات ۇستىندە وتىرىپ وقىپ بەردى.

«اباي اتامىزدىڭ شىعارمالارى بۇگىنگى كۇنگە دەيىن وزەكتىلىگىن جوعالتپاعان وشپەس شامشىراق دەۋگە بولادى. جولسىلتەر ولەڭدەر. وسى جولسىلتەر بولعان، ومىرىمە سەپتىگىن تيگىزگەن شۋماقتاردى ايتىپ بەرسەم»، - دەدى ايداربەك قوجانازاروۆ Instagram پاراقشاسىندا جاريالانعان ۆيدەودا.

سونىمەن قاتار ول ەستافەتانى قوستاناي قالاسىنىڭ اكىمى مارات جۇندىبايەۆقا جولداپ، شاھاردا اباي ەسكەرتكىشىن اشۋ كەرەكتىگىن جۇقالاپ جەتكىزەدى.

ال وڭتۇستىك كورەيادا جۇرگەن دەپۋتات ولجاس قۇسپەكوۆ سەۋل قالاسىندا اباي قۇنانباي ۇلىنىڭ قۇرمەتىنە ورناتىلعان بيۋست جانىندا «سەنبە جۇرتقا، تۇرسا دا قانشا ماقتاپ» دەگەن ولەڭىن وقىدى.

اباي ولەڭدەرىن وقۋ چەللەندجىن كۆازيمەملەكەتتىك ۇيىمدار مەن قۇتقارۋشىلار دا جالعاستىرىپ جاتىر. ماسەلەن، «قازپوشتا» باسقارما ءتوراعاسى اسەل جاناسوۆا «كوزىمنىڭ قاراسى» ءانىن ورىندادى.

ال اقمولا وبلىسى جاقسى اۋداندىق توتەنشە جاعدايلار ءبولىمىنىڭ باستىعى ءبىرجان ابىلماجەنوۆ «جاسىمدا عىلىم بار دەپ ەسكەرمەدىم» دەگەن ولەڭىن وقىپ بەردى.

8-تامىز كۇنى تانىمال ءانشى ديماش قۇدايبەرگەن اباي قۇنانباي ۇلىنىڭ تۋعان كۇنى قارساڭىندا تىڭ چەللەندج باستاعان ەدى.

چەللەندجدى مادەنيەت جانە سپورت ءمينيسترى اسحات ورالوۆ جانە باسقا دا كوپتەگەن قازاقستان ازاماتتارى قولداپ، الەۋمەتتىك جەلىلەردە اباي ولەڭدەرىن وقىعان ۆيدەولارىن سالىپ جاتىر.

ق ر پرەزيدەنتىنىڭ تەلەراديوكەشەنىنىڭ، سونىڭ ىشىندە قازاقپارات اگەنتتىگىنىڭ ۇجىمى اتالعان چەللەندجدەن تىس قالمادى.