ۇلتتىق مۋزەيگە اباي قولدانعان ساماۋرىن تابىستالدى
مادەنيەت جانە سپورت مينيسترلىگىنەن ءمالىم ەتكەندەي، 1893 -جىلى جاسالعان، تاريحي قۇندىلىعى جوعارى جادىگەر اباي اتىنداعى حالىقارالىق مادەنيەت پەن ونەردى قولداۋ قورى اتىنان بەرىلىپ وتىر.
«بۇل - سەمەي قالاسىنداعى مەتسەنات بەكباي بايسوۆتىڭ كەرۋەن سارايىندا تۇرعان، اباي قۇنانباي ۇلى باستاعان قازاق زيالىلارى شاي ىشكەن ساماۋرىن»، - دەلىنگەن مينيسترلىك مالىمەتىندە.
مادەنيەت جانە سپورت ۆيتسە-ءمينيسترى ارمان جۇدەبايەۆ ابايدىڭ قازاق مادەنيەتى مەن رۋحانياتىنا قوسقان ايرىقشا ۇلەسىن ايتا كەلە، قازاقتىڭ باس اقىنى اتانعان ۇلى تۇلعانىڭ ءومىرى مەن شىعارماشىلىعى ءالى دە تولىق زەرتتەلمەگەنىن اتاپ ءوتتى.
قازىرگى تاڭدا ۇلتتىق مۋزەي قورىندا اباي قۇنانباي ۇلىنىڭ ءومىرى مەن شىعارماشىلىعىنا قاتىسى بار 42 جادىگەر ساقتالعان. ولاردىڭ اراسىنان اقىننىڭ جەكە پايدالانعان قۇتىسىن، كوزى تىرىسىندە باسپادان شىققان كىتاپتاردى جانە تاعى باسقا ماڭىزدى دۇنيەلەردى كورۋگە بولادى.
