اتىراۋ مۋزەيىندە اباي ۇستاعان ءۇش ىشەكتى دومبىرانىڭ كوشىرمەسى تۇر
اتىراۋ وبلىستىق تاريحي- ولكەتانۋ مۋزەيى ابايدىڭ تۋعان كۇنىنە وراي ءىس- شارادا كونە جادىگەرلەر توپتاماسىن ۇسىندى. ونىڭ ىشىندە XIX- XX عاسىرلاردا قولدانىلعان اعاش جانە تەرى ىدىستار، ات ابزەلدەرىنىڭ جيىنتىعى بار.
جۇرتشىلىقتى قازاقتىڭ ۇلى اقىنى اباي قۇنانباي ۇلىنىڭ تۇتىنعان بۇيىمدارى ەرەكشە قىزىقتىرادى. قازىر مۋزەيدە اقىننىڭ ءۇش ىشەكتى دومبىراسى مەن توعىزقۇمالاق تاقتاسىنىڭ كوشىرمەلەرى تۇر. توعىزقۇمالاق تاقتاسىن سالاتىن دورباسى بار. دوربا بىلعارىدان تىگىلگەن.
ءۇش ىشەكتى دومبىرانىڭ شاناعى سوپاقشا، شىرشا اعاشىنان جاسالعان بەت قاقپاعىندا ءۇش تەسىگى بار. ونىڭ شاناعى بالقاراعايدان ويىلىپ جاسالعان. جالپاق مويىنىنىڭ ولشەمى – 75*12 س م، ءۇش قۇلاعى بار.
ال توعىزقۇمالاق تاقتاسى ءۇش بولەك تاقتايدى ءبىر- بىرىنە جالعاۋ ارقىلى جاسالعان. ەكى جاعىنداعى تاقتايدىڭ ءارقايسىسىندا 9 وتاۋ بار. ال ورتاسىنداعى تاقتايدا سوپاقشا پىشىندە يرەكتەلگەن گۇل ءتارىزدى ەكى قازان ويىلعان. تاقتايدىڭ بەتى قوڭىر، ەكى قازاننىڭ ءبىرى كوك، ەكىنشىسى قىزعىلت قوڭىر تۇسپەن بويالعان. وتاۋلارعا اق، كوك، قوڭىر سەكىلدى بىرنەشە ءتۇستى بوياۋ جاعىلعان.
«اقىننىڭ مۇراسىن ۇرپاقتان- ۇرپاققا ناسيحاتتاۋ ماقساتىندا 2020 -جىلى «جيدەباي- ءبورىلى» مەملەكەتتىك قورىق مۋزەيىمەن كەلىسىم جاسالعان ەدى. سول جىلى اقىننىڭ جەكە تۇتىنعان ءۇش ىشەكتى دومبىراسى مەن توعىزقۇمالاق تاقتاسىنىڭ كوشىرمەسى جاسالىپ، عىلىمي قورعا قابىلدانعان. ءۇش ىشەكتى دومبىرانىڭ قوڭىر ءۇنى قۇلاققا جاعىمدى ەستىلەدى. بۇل دومبىرانى كەزىندە ابايدىڭ ءوزى جانە ۇلى اقىلباي ءجيى تارتقان. ال ۇلتتىق ويىن توعىزقۇمالاقتى شاكىرتتەرىمەن بىرگە، ەكى- ءۇش كۇنگە دەيىن وينايتىن بولعان. ويىندى جاقسى كورگەنى سونشا، قارسىلاسىن جەڭبەي تىنبايدى ەكەن»، - دەپ حابارلادى مۋزەي قىزمەتكەرلەرى.
ەسكە سالا كەتەلىك، بۇعان دەيىن اتىراۋلىقتار اباي كۇنىندە تاريحي تۇلعالار شەرۋىنە كۋا بولعانىن حابارلاعان ەدىك.