گاۆايدەگى ءورت: تاريحي قالا ورتەنىپ كەتتى، قۇرباندار بار
گاۆاي گۋبەرناتورى دجوش گريننىڭ ايتۋىنشا، 9 مىڭ حالقى بار تۋريستىك جانە تاريحي ورتالىق لاحاينانىڭ كوپ بولىگى قيراپ، جۇزدەگەن وتباسى ەۆاكۋاتسيالاندى. ا ق ش شتاتىنىڭ سەناتورى برايان شاتس الەۋمەتتىك جەلىلەردە لاحاينا «تولىعىمەن دەرلىك ورتەنىپ كەتتى» دەپ مالىمدەدى. جەرگىلىكتى تۇرعىندار جۇرەكتى اۋىرتاتىن كورىنىستەر تۋرالى حابارلايدى.
«بىزدە ەندى لاحاينا جوق. ول ەندى جوق»، - دەدى مارك شتەفل CNN تىلشىسىنە. ارالدىڭ اۋرۋحانالارى كۇيىك شالعان، سونداي-اق تۇتىننەن ۋلانعان ناۋقاستارعا تولى، دەپ حابارلايدى BBC News.
ماۋي ارالىنداعى ءورتتىڭ كوپشىلىگى ءىشىنارا 800 ميلدەن استام قاشىقتىقتاعى دورا داۋىلىنان بولعان قاتتى جەلدەن تۋىنداعان، ول ءالى دە اۋىزدىقتالعان جوق. داۋىل كەزىندە جەل ەكپىنى 97 ك م/ساع بولدى.
«ءورت سوندىرۋشىلەر جالىنمەن ءالى كۇرەسىپ جاتىر، ال ءبىزدىڭ توتەنشە جاعدايلار قىزمەتى ىزدەۋ-قۇتقارۋ رەجيمىندە جۇمىس ىستەۋدە»، - دەدى شاتس.
سارسەنبى كۇنى تاڭەرتەڭ كەيبىر ادامدار تەز تارالعان جالىننان قاشىپ، مۇحيتقا سەكىرگەنى تۋرالى اقپارات تارالدى. ا ق ش جاعالاۋ كۇزەتى سۋدان كەم دەگەندە ون ادامدى قۇتقارعانىن مالىمدەدى. ماۋي وكرۋگىنىڭ ءمەرى كىشى ريچارد بيسسەن باسپا ءسوز ءماسليحاتىندا كوپتەگەن ءۇي مەن بيزنەس قۇرىلىمدارى تولىعىمەن قيراعانىن ايتتى. شەنەۋنىكتەر قازىر ماۋيدەگى زالالدىڭ ناقتى كولەمىن انىقتاۋ قيىن ەكەنىن ايتىپ، قازا بولعاندار سانى ارتۋى مۇمكىن ەكەنىن ەسكەرتتى. ءورت سالدارىنان مىڭداعان ادام ەلەكتر قۋاتىنسىز جانە ۇيالى بايلانىسسىز قالادى.
ا ق ش پرەزيدەنتى دجو بايدەن ءوز مالىمدەمەسىندە ەل ۇكىمەتىنىڭ گاۆايگە جالىنمەن كۇرەس جۇرگىزۋگە كومەك جىبەرگەنىن جانە قۇتقارۋ جۇمىستارىن جالعاستىرىپ جاتقانىن اتاپ ءوتتى. لاحاينا - ماۋيدىڭ باتىس شەتىندەگى تاريحي قالا.
ول ا ق ش- تىڭ تاريحي ورىندارىنىڭ ۇلتتىق تىزىلىمىنە ەنگىزىلگەن.
