نۇرلان ماسىموۆكە قاتىستى سوت ۇكىمى شىقتى

استانا. قازاقپارات - پاۆلودار وبلىسى پوليتسيا دەپارتامەنتىنىڭ بۇرىنعى باستىعىنا قاتىستى سوت ۇكىمى شىقتى.

نۇرلان ءماسىموۆ مۇلكى تاركىلەنىپ، 10 جىلعا باس بوستاندىعىنان ايىرىلدى، - دەپ حابارلايدى Massaget.kz ءتىلشىسى.

پاۆلودار وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قىلمىستىق ءىس بويىنشا القابيلەر قاتىسقان وڭىرلىك پوليتسيا دەپارتامەنتىنىڭ بۇرىنعى باستىعى نۇرلان ءماسىموۆ، ونىڭ ورىنباسارى دامير سيرازيديموۆ جانە كاسىپكەر ەۆگەني ەۆكوۆيچتىڭ سوت پروتسەسى اياقتالدى.

«ماسىموۆ نۇرلان مىرزاحان ۇلى 366-باتىڭ 4-بولىگى، 189-باپتىڭ 4-بولىگى 2-تارماعى، 392-باپتىڭ 1-بولىگى بويىنشا كىنالى دەپ تانىلىپ، مۇلكى تاركىلەنسىن. سونداي-اق، ەكىنشى دارەجەلى «ايبىن» وردەنى مەن پوليتسيا گەنەرال-مايورىنىڭ ارنايى اتاعىنان ايىرىلسىن»، - دەپ ۇكىمدى پاۆلودار وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى وقىدى.

نۇرلان ءماسىموۆ پارا العانى، سەنىپ تاپسىرىلعان بوتەننىڭ مۇلىكىن اسا ءىرى مولشەردە يەمدەنگەنى نەمەسە ىسىراپ ەتكەنى ءۇشىن ايىپتالدى. سونداي-اق، پاۆلودار وبلىسى پوليتسيا دەپارتامەنتىنىڭ بۇرىنعى باستىعى مەملەكەتتىك شەكارانى قاساقانا زاڭسىز كەسىپ وتكەنى ءۇشىن ايىپتالدى. سوت وتىرىستارىنىڭ بىرىندە ول مەملەكەتتىك شەكارانى زاڭسىز كەسىپ وتكەن كىناسىن عانا مويىنداعان بولاتىن.

دامير سيرازيديموۆتى سوت 368-باپتىڭ 2-بولىگى مەن 189-باپتىڭ 4-بولىگى 2-تارماعى بويىنشا كىنالى دەپ تاۋىپ، 8 جىلعا باس بوستاندىعىنان ايىرۋ جازاسىن تاعايىندادى. ەۆگەني ليەۆكوۆيچ 189-باپتىڭ 4-بولىگى 2-تارماعى بويىنشا كىنالى دەپ تانىلىپ، 7 جىلعا سوتتالدى.

ليەۆكوۆيچ پەن سيرازيديموۆ سوت ۇكىمى شىققاننان كەيىن سوت زالىندا قاماۋعا الىندى. ايتا كەتەيىك، سوت پاۆلودار وبلىسى ءى ءى د- ءنىڭ 421,6 ميلليون تەڭگە ازاماتتىق تالابىن ءىشىنارا قاناعاتتاندىردى، سوتتالعانداردى زالالدى ىنتىماقتى تارتىپپەن وتەۋگە مىندەتتەدى.

ەسكە سالايىق، 2022-جىلعى قاڭتاردا نۇرلان ءماسىموۆ پاۆلودار وبلىسىنىڭ پوليتسيا باستىعى قىزمەتىنەن بوساتىلدى. ول دەپارتامەنتتى 2019-جىلعى قاراشادان باستاپ باسقاردى.

بىلتىر ساۋىردە نۇرلان ءماسىموۆتىڭ ىزدەۋدە ەكەنى بەلگىلى بولدى. كەيىنىرەك سىبايلاس جەمقورلىققا قارسى قىزمەت ونىڭ ورنالاسقان جەرى تۋرالى اقپارات ءۇشىن سىياقى جاريالادى. شىلدەدە ءماسىموۆ رەسەيمەن شەكارادا جالعان قۇجاتتارمەن ۇستالدى.