اباي كۇنى: ا ق ش ەلشىلىگى اۋماعىندا كيىز ءۇي قۇرىلدى

استانا. قازاقپارات - امەريكا قۇراما شتاتتارىنىڭ قازاقستانداعى ەلشىلىگى اباي كۇنى قۇرمەتىنە ءوز اۋلاسىندا كيىز ءۇي قۇردى، دەپ حابارلايدى قازاقپارات.

باستامانى ا ق ش- تىڭ قازاقستانداعى توتەنشە جانە وكىلەتتى ەلشىسى دەنيەل روزەنبليۋم كوتەرگەن. كيىز ءۇي قۇرۋ ۆيدەوسى ەلشىلىكتىڭ الەۋمەتتىك جەلىدەگى پاراقشالارىندا جاريالاندى.

«ەلشى دەنيەل روزەنبليۋم ەلشىلىكتىڭ اۋلاسىندا قازاق ءۇي قۇرۋ راسىمىنە اسا قۋانىشپەن بەلسەنە ارالاستى. «باسقا حالىقتىڭ ءتىلى مەن مادەنيەتىن ءبىلۋ ادامدى سول حالىقپەن تەڭ ەتەدى» دەيدى ۇلى اباي»، - دەپ جازىلعان ەلشىلىك حابارلاماسىندا.

ەلشىلىكتىڭ حابارلاۋىنشا، كيىز ءۇي كۇن رايى سۋىتقانشا تۇرادى. كەيىنىرەك ەلشىلىك ىشىنە اۋىستىرىلادى.

ايتا كەتەيىك، بۇگىن قازاقستاندا اباي كۇنى اتالىپ وتەدى. بيىل قازاقتىڭ ۇلى اقىنىنىڭ تۋعانىنا 178 جىل تولدى.

2020-جىلى ابايدىڭ 175 جىلدىعىندا 10- تامىز - اباي كۇنى بولىپ بەكىتىلگەن ەدى. قازاقتىڭ ۇلى اقىنى، ۇلتتىق جازبا ادەبيەتىنىڭ جانە ادەبي ءتىلىنىڭ نەگىزىن سالۋشى، اعارتۋشى اباي (يبراھيم) قۇنانباي ۇلى 1845-جىلى قازىرگى شىعىس قازاقستان وبلىسى اباي اۋدانىندا دۇنيەگە كەلگەن.

اباي ولەڭدەرى باي فيلوسوفيالىق، كۇرەسكەرلىك قاسيەتكە يە. ول ەڭ الدىمەن قازاقتىڭ تەلەگەي-تەڭىز اۋىز ادەبيەتىنەن سۋسىنداپ، باتىرلار جىرى مەن عاشىقتىق جىرلارىنىڭ ۇردىسىنە مۇراگەرلىك ەتتى. «ەسكەندىر»، «ماسعۇت»، «ءازىم اڭگىمەسى» - ابايدىڭ شىعارماشىلىق مۇراسىنداعى پوەمالارى دا زەرتتەۋشىلەردىڭ نازارىندا. اباي قازاقتىڭ ولەڭ ۇلگىسىن جاڭاشا تۇرعىدان بايىتا ءتۇستى. سوندىقتان ابايدى قازاق جازبا ادەبيەتىنىڭ نەگىزىن قالاۋشى دەپ اتاۋعا بولادى.