بيىل قىزىلشا جۇقتىرۋ دەرەكتەرى ءوستى - باس سانيتاريالىق دارىگەر
بۇل تۋرالى دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتاريالىق دارىگەر ايجان ەسماعامبەتوۆا ايتتى، دەپ حابارلايدى قازاقپارات ءتىلشىسى.
«كەيىنگى 10 جىلدا ەلدە قىزىلشا اۋرۋىن جۇيقتىرۋ جاعدايلارىن قوسپاعاندا، ۆاكسينامەن باسقارىلاتىن ينفەكسيالار بويىنشا ەپيدەميولوگيالىق جاعداي تۇراقتى. بيىل قىزىلشامەن سىرقاتتانۋ دەرەكتەرىنىڭ ءوسۋىن بايقاپ وتىرمىز. ءقازىر قىزىلشانى جۇقتىرۋدىڭ 3037 جاعدايى تىركەلگەن»، - دەدى ا. ەسماعامبەتوۆا ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، قىزىلشا اۋرۋى ەلدىڭ بارلىق ايماعىندا تىركەلىپ جاتىر. اتاپ ايتقاندا، قىزىلشا الماتى قالاسىندا (1101)، جامبىل (430)، الماتى (352)، اتىراۋ وبلىستاردا (237)، استانا (209) جانە شىمكەنت (194) قالالارىندا كوپ انىقتالعان.
«اۋرۋ جۇقتىرۋدىڭ جاعدايىنىڭ وسۋىنە قىزىلشاعا قارسى جوسپارلى ۆاكسيناتسيا الماعان بالالاردىڭ كوبەيۋى سەبەپ بولىپ وتىر. ماسەلەن، اۋىرعانداردىڭ 72 پايىزىندا ۆاكسيناتسيالانباعان بالالار انىقتالدى. ونىڭ ىشىنەن 60 پايىزىندا اتا-انالاردىڭ ۆاكسيناتسيادان باس تارتۋىنا بايلانىستى بولعان (1282)، 20 پايىزىندا (416) ەكپەگە مەديتسينالىق قارسى كورسەتىلىمدەرى انىقتالدى، سونداي-اق قالعان 20 پايىزىندا (431) بالالار ۆاكسينا ەگۋ جاسىنا جەتپەگەن»، - دەدى ۆيتسە-مينيستر.
