ب ج ز ق قىزمەتكەرى رەتىندە قوڭىراۋ شالۋ - الاياقتىقتىڭ جاڭا ءتۇرى شىقتى
«تەلەفون ارقىلى جاسالاتىن الاياقتىقتىڭ جاڭا ءتۇرى - ءوزىن ءبىرىڭعاي جيناقتاۋشى زەينەتاقى قورى(ب ج ز ق) قىزمەتكەرى رەتىندە تانىستىرىپ، قانداي دا ءبىر كومپانيانىڭ باس بۋحالتەرىنە قوڭىراۋ شالىپ، سول ۇيىمنىڭ قىزمەتكەرىنىڭ زەينەتاقى شوتىنىڭ بۇعاتتالعانى تۋرالى حابارلايدى. بۇعاتتان شىعارۋ ماقساتىندا بۋحالتەرلەرگە الاياقتاردىڭ شوتىنا بەرەشەك سومانىڭ جارتىسىن سالۋعا كەڭەس بەرەدى، ايتپەسە كومپانياعا زەينەتاقى جارنالارىن ۋاقتىلى ەسەپتەمەگەنى ءۇشىن ايىپپۇل سالىنادى دەپ قورقىتادى. وسىلايشا، تەلەفون ارقىلى سويلەسۋ بارىسىندا الاياقتار ءوز قۇرباندارىن ولاردىڭ شوتتارىنا ۇلكەن اۋدارىمدار جاساۋعا يتەرمەلەيدى. مۇنداي الاياقتىقتىڭ قۇربانى بولماۋ ءۇشىن كەز كەلگەن اقپاراتتى ب ج ز ق بايلانىس ورتالىعىنىڭ 1418 نومىرىنە قوڭىراۋ شالۋ ارقىلى تەكسەرىڭىز» دەلىنگەن حابارلامادا.
ايتا كەتەيىك، ب ج ز ق قىزمەتكەرلەرىنىڭ قاراجاتتى بەلگىلى ءبىر شوتقا اۋدارۋدى تالاپ ەتۋگە قۇقىعى جوق.
