قاسىم-جومارت توقايەۆتىڭ پاۆلودار وبلىسىنا ساپارىنان ۆيدەو جاريالاندى
بۇگىن ق. توقايەۆ جۇمىس ساپارىمەن پاۆلودار وبلىسىنا باردى.
مەملەكەت باسشىسى ەكىباستۇزداعى جىلۋ ەلەكتر ورتالىعىندا جۇرگىزىلىپ جاتقان جوندەۋ جۇمىستارىمەن تانىستى.
پرەمەر-ءمينيستردىڭ ءبىرىنشى ورىنباسارى رومان سكليار ەكىباستۇز قالاسىنداعى جىلۋمەن قامتۋ جۇيەسىن جاڭعىرتۋعا ۇكىمەت تاراپىنان كورسەتىلگەن قولداۋ شارالارى تۋرالى باياندادى.
پرەزيدەنت جەو جاعدايىمەن تانىسقان سوڭ جەرگىلىكتى تۇرعىندارمەن اڭگىمەلەستى. كوپبالالى انا ايانا سماعۇلوۆا قالادا بالالاردىڭ بوس ۋاقىتىن ءتيىمدى وتكىزىپ، ولاردىڭ جان-جاقتى دامۋىنا ارنالعان شىعارماشىلىق ءۇيىن سالىپ بەرۋدى سۇرادى. ال قالالىق ارداگەرلەر كەڭەسىنىڭ ءتوراعاسى سامات رامازانوۆ جىلۋ جۇيەسىندەگى جوندەۋ جۇمىستارىن جەكە باقىلاۋىنا الۋدى جانە قالالىق «شاحتەر» ساياباعىن جوندەۋدى ءوتىندى.
كەيىن قاسىم-جومارت توقايەۆ پاۆلودار وبلىسى كاسىپورىندارىنىڭ ونىمدەرى قويىلعان كورمەنى ارالاپ كوردى. كورمەگە تاماق جانە قايتا وڭدەۋ، اۋىل شارۋاشىلىعى سونداي-اق مەتاللۋرگيا، ماشينا جاساۋ، قۇرىلىس يندۋسترياسى، مۇناي حيمياسى جانە فارماتسيەۆتيكا سالالارىنداعى كاسىپورىندار قاتىستى.
وبلىس اكىمى اسايىن بايحانوۆتىڭ بايانداۋىنشا، ءبىرىنشى جارتىجىلدىقتا وڭىرگە 344 ميلليارد تەڭگە ينۆەستيتسيا تارتىلعان. بۇل بىلتىرعى كەزەڭمەن سالىستىرعاندا 30 پايىزعا كوپ. بۇدان بولەك، پرەزيدەنتكە وڭىردەگى ەلەكتروەنەرگەتيكالىق كاسىپورىنداردىڭ تەحنيكالىق جاعدايى تۋرالى باياندالدى. وبلىس اكىمى گرەس-1 جانە گرەس-2 ەنەرگوبلوكتارىن، سونداي-اق اقسۋ قالاسىنداعى 7№ ەلەكتروستانتسيانى جاڭعىرتۋ جۇمىستارى 2024-جىلى اياقتالاتىنىن ايتتى.
سونداي-اق پرەزيدەنتكە Poly Metal International plc حالىقارالىق كومپانياسى قولعا العان ءىرى جوبانىڭ جۇزەگە اسىرىلۋ بارىسى جونىندە مالىمەت بەرىلدى.
جوبا اياسىندا قۇرامىندا التىنى بار 300 مىڭ توننا كونتسەنتراتتى قايتا وڭدەپ، ودان 15 توننا التىن الۋ جوسپارلانعان. وندىرىسكە قۇيىلاتىن ينۆەستيتسيا كولەمى - 347 ميلليارد تەڭگە.
كەيىن ق. توقايەۆ قۇرىلىس ماتەريالدارىن شىعارۋمەن جانە ءتۇرلى ماقساتتا قولدانىلاتىن نىساندار سالۋمەن اينالىساتىن «ZENITH» زاۋىتىنا باردى.
ودان ءارى تۇرعىندارعا وفتالمولوگيالىق قىزمەتتەر كورسەتەتىن كلينيكاعا، پاۆلودار اقپاراتتىق تەحنولوگيالار كوللەدجىنىڭ نەگىزىندە قۇرىلعان ايماقتىق IT- Hub-قا باردى.
ءوڭىردىڭ كرەاتيۆتى جاستارىمەن كەزدەسۋىندە مەملەكەت باسشىسىنا بالانىڭ اقىل-وي قابىلەتىن دامىتاتىن Ibars-kids موبيلدىك ويىنى تانىستىرىلدى.
