وسكەمەن تۇرعىنىنىڭ كولىگى مەن اقشاسىن تارتىپ العان ەكى ادام ۇستالدى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءتارتىپ ساقشىلارىنا ەكى ەر ادامنىڭ وسكەمەن تۇرعىنىن بوپسالاعانى تۋرالى اقپارات تۇسكەن. پوليتسەيلەر ق ر ۇلتتىق ۇلانىنىڭ ارنايى بولىمشەسىمەن بىرلەسىپ، جەدەل- ىزدەستىرۋ شارالارىنا كىرىستى. كوپ ۇزاماي 25 جانە 26 جاستاعى ەكى كۇدىكتى ۇستالدى.
«بەلگىلى بولعانداي، ولار جابىرلەنۋشىنى قورقىتۋ ءۇشىن قالا سىرتىنا كۇشتەپ اپارعان. قىلمىستىق ارەكەتتەرىمەن ونىڭ «iPhone 14 Pro» ماركالى ەكى ۇيالى تەلەفونىن، 800000 تەڭگە اقشاسىن جانە «Mercedes-Benz» ماركالى كولىگىن بوپسالاپ العان. ۇستالعاندار ءوز كىنالارىن مويىندادى. زاتتاي دالەلدەمەلەر ءىشىنارا (400000 تەڭگە سوماسىنداعى اقشا) الىندى»، - دەلىنگەن اقپاراتتا.
سونىمەن قاتار، اۆتوكولىكتى تەكسەرۋ بارىسىندا سالوننان قوساۋىز مىلتىقتىڭ كەسىندىسى جانە 4 وق تابىلدى. كۇدىكتىلەر سوت سانكتسياسىمەن قاماۋعا الىندى.
اتالعان فاكتى بويىنشا ق ر ق ك-نىڭ 194-بابى 3-بولىگىنە، 125-بابى 2-بولىگىنە جانە 287-بابى 3-بولىگىنە سايكەس سوتقا دەيىنگى تەرگەۋ امالدارى باستالدى.
