وقۋشىلارعا ارنالعان بايقوڭىرعا ساپارلاۋ تۋرى ىسكە قوسىلادى

استانا. قازاقپارات - بيىل جاڭا وقۋ جىلىنان باستاپ قازاقستاندىق وقۋشىلار بايقوڭىر عارىش ايلاعىنا ساپارلاي باستايدى.

بۇل تۋرالى تولىعىراق «Kazakh Tourism» ا ق باسقارما ءتوراعاسىنىڭ ورىنباسارى قايرات ءسادۋاقاسوۆ ايتىپ بەردى. دەپ حابارلايدى قازاقپارات ءتىلشىسى.

«وسىدان 5 جىل بۇرىن مەكتەپ تۋرلارىن ازىرلەي باستادىق. بۇل باعىتتا تانىمال تۇلعالاردى تارتا باستادىق. بۇگىندە بۇل باستامانى اكىمدىكتەر قولعا الدى. قازىر بايقوڭىرعا وقۋشىلار تۋرىن ازىرلەپ جاتىرمىز. ءتۋريزمدى ىلگەرىلەتۋدە مەكتەپتەر دە اشىق بولۋى كەرەك. وقۋشىلارعا ارنالعان تۋرلاردى ۇيىمداستىرۋدا ءبىز قاۋىپسىز، اككرەديتتەلگەن جانە تاجىريبەسى جەتكىلىكتى تۋروپەراتورلاردى تارتۋعا دايىنبىز. بۇل جەردە بالالاردىڭ ەكولوگيالىق ساۋاتىن اشا ءتۇسۋ ماسەلەسى دە شەشىمىن تابادى. مىسالى، تورىش اڭعارىندا تاس ۇرلانعان. بۇل جەردە ماسەلە جالپى مادەنيەتتىڭ جوقتىعى. وسى ورايدا بالالارعا ەرتە جاستان ءجون سىلتەۋ كەرەك. ول تۋرالى ۇنەمى ايتۋ كەرەك، بۇل جەردە ۇرلانعان تاستىڭ گەولوگيالىق قۇندى دۇنيە ەكەنىن ايتۋ جەتكىلىكسىز»، - دەدى قايرات ءسادۋاقاسوۆ.

ونىڭ ايتۋىنشا، جىل سايىن 15 مىڭ جاس قازاقستاندىق تۋريزم تۋرالى ءدارىس الادى.

«كەلەسى ايدا ءبىز اككرەديتتەلگەن تۋروپەراتورلار توبىمەن بايقوڭىرعا بارامىز. وندا وقۋشىلارعا ارنالعان تۋرلاردى قالاي وتكىزۋ كەرەگىن قاراستىرامىز. بيىل مامىردا ءبىز زىمىران ۇشىرۋ ساتىنە كۋا بولدىق. وندا بارۋدىڭ جەڭىل جولدارى بار. جالعا بەرىلگەن ايماق بولعاندىقتان كەيبىر كەدەرگىلەر بولدى. ەندى ول وڭايعا تۇسەدى، سەبەبى عارىش ايلاعىنىڭ جەكەلەگەن الاڭدارى قازعارىشقا بەرىلەدى. بيىل وقۋ جىلىنىڭ باسىندا وقۋشىلارعا قىزىقتى تۋر ۇسىنامىز دەپ ويلايمىن. بۇل جەردە وقۋ- اعارتۋ مينيسترلىگىنىڭ بىرلەسۋى وتە ماڭىزدى. ولار بالالارعا قىزىقتى ساباقتار ۇيىمداستىرۋ جاعىنان قول ۇشىن سوزۋى كەرەك. سونداي- اق ىسكە تۋروپەراتورلاردى تارتقان ءجون»، - دەدى سپيكەر.

سونداي- اق سپيكەر تۋردى ۇيىمداستىرۋدا بالالاردىڭ قاۋىپسىزدىگى جانە تۋروپەراتورلارعا ارتىلاتىن جاۋاپكەرشىلىك تۋرالى ايتتى.

«تۋر كەزىندە بالالارمەن توتەنشە جاعداي بولىپ قالسا، سول ءۇشىن بۇل جەردە جاۋاپتى بىرەۋ بولۋى كەرەك. وسى ورايدا نورماتيۆتىك- قۇقىقتىق اكتىلەر ارقىلى تۋروپەراتورلارعا قوسىمشا جاۋاپكەرشىلىك بەلگىلەۋگە دايىنبىز. تۋروپەراتورلار جاۋاپكەرشىلىكتەن قاشپايدى. ولار بۇعان دەيىن دە دارىگەرلەر، مۇعالىمدەردىڭ قاتىسۋىمەن تۋرلار ۇيىمداستىرىپ كەلەدى. بۇل مىندەتتى ورىنداۋ ءۇشىن سۋبسيديا قاجەت»، - دەيدى قايرات ءسادۋاقاسوۆ.