جاھاندى جاياۋ ارالاۋعا شىققان ۇلىتاۋلىق اقساقال رەسەي شەكاراسىنا جەتتى

اتىراۋ. قازاقپارات - جاھان ەلدەرىن جاياۋ ارالاۋ ءۇشىن اتىراۋدان جولعا شىققان ۇلىتاۋلىق اقساقال رەسەي شەكاراسىنا جەتتى، دەپ حابارلايدى قازاقپارات ءتىلشىسى.

ۇلىتاۋ وبلىسىندا تۇراتىن 73 جاستاعى ساياحاتشى سارسەنباي قوتىراشوۆتىڭ 2- تامىزدا اتىراۋدان جولعا شىققان ەدى.

ساياحاتشى بۇگىن، 8- تامىزدا قازاقستان- رەسەي شەكاراسىنا جەتتى. بۇل تۋرالى ساياحاتشى ءوزىنىڭ Instagram جەلىسىندەگى پاراقشاسىندا ءبولىستى.

«مىنە، شەكاراعا جەتتىم. ءبىرىنشى شەكارادان وتكەلى تۇرمىن. اتىراۋدان 300 شاقىرىمنان استام جاياۋ ءجۇردىم. جولدىڭ كەيبىر جەرى ناشار، كەيبىر تۇسى جاقسى. جول سالىنىپ جاتىر. كەلەسى جىلعا دەيىن بىتەتىن شىعار. بۇگىن مىنە، ءبىرىنشى رەت شەكارانى كورىپ، قوبالجىپ تۇرمىن. اللا ءساتىن سالسا، وتەرمىن، ساۋ بولىڭىزدار، قازاقستاندىقتار»، - دەدى سارسەنباي قوتىراشوۆ.

ەگدە جاستاعى ساياحاتشى سارسەنباي قوتىراشوۆ الەمدى جاياۋ ارالاۋ ساپارىنا شىعار الدىندا اتىراۋلىق جاستارمەن كەزدەستى.

«مەنىڭ جاياۋ ساپارىم الەمنىڭ بىرنەشە ەلىن قامتيدى. قازاقستاننان جولعا شىعىپ، رەسەي، گرۋزيا، تۇركيا، بولگاريا، سەربيا، ۆەنگريا، اۆستريا، گەرمانيا، فرانسيا، ا ق ش، قىتاي، موڭعوليا ەلدەرىنە بارامىن. كەيىن رەسەي ارقىلى قازاقستانعا ورالۋدى كوزدەپ وتىرمىن. جاياۋ ساپارىم 2 جىلعا سوزىلىپ، 2025 -جىلدىڭ تامىزىندا اياقتايمىن دەگەن جوسپارىم بار»، - دەيدى سارسەنباي قوتىراشوۆ.

سارسەنباي قوتىراشوۆ جاياۋ ساپارىن بىرنەشە باعىتقا بولگەن. العاشقى مارشرۋتى - قازاقستان، رەسەي، گرۋزيا، تۇركيا ەلدەرىنە بارۋ. بۇل ەلدەردى ارالاۋ ءۇشىن 3 مىڭ شاقىرىمعا جۋىق جول جۇرەدى. بۇعان 100 كۇن قاجەت.

ەكىنشى باعىتتاعى تۇركيا، فرانسيا، ا ق ش ەلدەرىن 180 كۇندە ارالاۋدى جوسپارلاپ وتىر. بۇل ءۇشىن 9 مىڭ شاقىرىمنان استام جولدى ەڭسەرمەك.

ءۇشىنشى كەزەڭە ا ق ش- تان باستاپ، قىتاي، موڭعوليا، رەسەي ارقىلى قازاقستانعا ورالادى. بۇل كەزەڭدە 130 كۇندە 4 مىڭ شاقىرىمنان استام جول جۇرەدى. ول ەكى جىلدا 16210 شاقىرىمدى باعىندىرماق.

ەسكە سالا كەتەلىك، بۇدان بۇرىن 73 جاستاعى اقساقال الەم ەلدەرىن جاياۋ ارالاۋعا اتىراۋدان جولعا شىققانىن جازعان ەدىك.