كاسىپكەر قايتارىمسىز مەملەكەتتىك گرانتتى قانداي ماقساتقا جۇمساي الادى
«قايتارىمسىز مەملەكەتتىك گرانتتار ۇكىمەتتىڭ 2019 -جىلعى 31- جەلتوقساندا بەكىتىلگەن كاسىپەرلىكتى دامىتۋ جونىندەگى ۇلتتىق جوباسى اياسىندا «جاڭا بيزنەس يدەيالاردى ىسكە اسىرۋعا مەملەكەتتىك گرانتتار بەرۋ» قاعيداسى نەگىزىندە بەرىلەدى. بيىل ءساۋىر ايىندا وسى قاعيداعا ءبىرقاتار وزگەرىس ەنگىزىلدى. ەندى گرانتقا تىركەلگەنىنە ءۇش جىل بولعان جەكە كاسىپكەر جانە رەسپۋبليكالىق تىزىلىمگە ەنگىزىلگەن الەۋمەتتىك كاسىپكەرلىك سۋبەكتىلەرى عانا قاتىسا الادى»، - دەدى قۋانىش ساپاروۆ استانا قالاسىنىڭ كوممۋنيكاتسيالار قىزمەتىندە وتكەن بريفينگتە.
باسقارما وكىلىنىڭ ايتۋىنشا، كونكۋرسقا قاتىسۋ ءۇشىن: كاسىپكەرمەن مەملەكەتتىك گرانت كولەمىنىڭ كەمىندە 20 پايىزى مولشەرىندە، ونىڭ ىشىندە بيزنەس- جوباعا قاتىساتىن جەكە جىلجىمالى نەمەسە جىلجىمايتىن مۇلىكپەن قوسا قارجىلاندىرۋى، جاڭا جۇمىس ورىندارىن قۇرۋ، كاسىپكەردىڭ بيزنەس- جوباسىندا ينفراقۇرىلىمنىڭ بولۋى جانە جوبانى ىسكە اسىرۋ ءۇشىن جەتكىلىكتى ينفراقۇرىلىم قۇرۋ كوزدەلگەن ينۆەستيتسيالىق جوسپاردىڭ بولۋى شارت.
«كاسىپكەرلەر گرانت قاراجاتىن تاۋارلاردى شىعارۋ نەمەسە قىزمەتتەر كورسەتۋ ءۇشىن قاجەتتى نەگىزگى قۇرالداردى، شيكىزاتتى جانە ماتەريالداردى، ماتەريالدىق ەمەس اكتيۆتەردى، تەحنولوگيالاردى، كەشەندى كاسىپكەرلىك ليتسەنزيا قۇقىقتارىن ساتىپ الۋعا، زەرتتەۋ جۇمىستارىنا جانە جاڭا تەحنولوگيالاردى ەنگىزۋگە قاتىستى شىعىستارعا عانا جۇمساي الادى. مەملەكەتتىك گرانتتارعا ءوتىنىم قابىلداۋ ءدال قازىر جۇرگىزىلىپ جاتىر. وتىنىمدەر 7-16-تامىز ارالىعىندا Kezekte.kz» ونلاين پورتال ارقىلى ەلەكتروندى تۇردە قابىلدانادى»، - دەدى ول.
