بەيبىت شۇمەنوۆ ىسىندە تاراپتاردى تاتۋلاستىرۋ نۇسقاسى دا قاراستىرىلادى - مينيستر

استانا. قازاقپارات – ق ر ىشكى ىستەر ءمينيسترى مارات احمەتجانوۆ ەلوردالىق تۇرعىنمەن جانجالداسقان بوكسشى بەيبىت شۇمەنوۆتى ىزدەۋگە قانشا قاراجات جۇمسالدى دەگەن سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«ىزدەۋ جۇمىستارىنا ەلىمىزدىڭ بيۋدجەتى جۇمسالمايدى، ويتكەنى حالىقارالىق ۋاعدالاستىقتار بەكىتىلگەن، ءبىز ينتەرپولدىڭ دا قاتىسۋشىسى بولىپ سانالامىز، بارلىق دەرەك حالىقارالىق مەكەمەلەرگە جىبەرىلەدى. وسىلايشا، بەلگىلى ءبىر ادامعا ارنايى قارجى بولىنبەيدى. بىزدە ا ق ش-پەن ەكستراديتسيالاۋ تۋرالى كەلىسىم جوق، ءبىراق ءوزارا قارىم-قاتىناس شارتتارىندا قۇقىقتىق كومەك كورسەتۋ تۋرالى كەلىسىم بار»، - دەدى مارات احمەتجانوۆ ۇكىمەت كۋلۋارىندا تىلشىلەرگە بەرگەن سۇحباتىندا.

ونىڭ ايتۋىنشا، قوس تاراپتىڭ تاتۋلاسۋ نۇسقاسى دا قاراستىرىلعان.

«مۇندا اۋىرلىعى ورتاشا ساناتتاعى ءىس قوزعالعان، تاراپتاردى تاتۋلاستىرۋ دا كوزدەلگەن. ەندى سوتقا دەيىنگى تولىققاندى تەرگەۋ جۇرگىزىلىپ، شەشىم قابىلدانادى»، - دەپ قوستى مينيستر.

ەسكە سالايىق، سپورتشى بەيبىت شۇمەنوۆكە مەملەكەتارالىق ىزدەۋ جاريالاندى.

ول 18-ماۋسىمدا استاناداعى «Mega Silkway» ساۋدا ويىن-ساۋىق ورتالىعىندا قولىنا بالا ۇستاعان ەر ادامدى ۇرىپ-سوقتى دەپ ايىپتالدى.

ەلوردانىڭ پوليتسيا دەپارتامەنتى قىلمىستىق كودەكستىڭ 293-بابى (بۇزاقىلىق) بويىنشا سوتقا دەيىنگى تەرگەۋ امالدارىن جۇرگىزىپ جاتىر.

بوكسشى الەۋمەتتىك جەلىدەگى پاراقشاسى ارقىلى ءوز ارەكەتىن تۇسىندىرمەك تە بولدى.

بۇل ىسكە تەكسەرۋ جۇرگىزگەندە قىزمەتىنە سالعىرت قاراعان پوليتسەيلەر دە جازالاندى. جەرگىلىكتى پوليتسيا قىزمەتى بولىمشەسىنىڭ كەزەكشىسى جانە پوليتسيانىڭ اعا ۋچاسكەلىك ينسپەكتورى قىزمەتتىك تالاپتاردى تولىق ورىنداماعانى تۋرالى ەسكەرتۋ الدى.

ەسىل اۋدانى پوليتسيا باسقارماسى باسشىسىنىڭ ورىنباسارى قىزمەتىنەن بوساتىلدى، ال اۋداندىق باسقارمانىڭ باسشىسىنا سوگىس جاريالاندى.