فۋتبول قاقپاسى قۇلاپ، بالانىڭ قايتىس بولۋى بويىنشا سوتقا دەيىنگى تەرگەۋ باستالدى
«7-تامىزدا پوليتسياعا مەكتەپ الاڭىندا فۋتبول ويناپ جۇرگەن بالانىڭ باسىنا تەمىر كونسترۋكسيا قۇلاپ، سالدارىنان ونىڭ سول جەردە قايتىس بولعانى تۋرالى حابارلاما ءتۇستى. اتالعان فاكتى بويىنشا بايقوڭىر اۋداندىق پوليتسيا باسقارماسى قىلمىستىق كودەكستىڭ 306-بابى بويىنشا قاۋىپسىزدىك تالاپتارىنا ساي كەلمەيتىن جۇمىستاردى ورىنداۋعا جانە قىزمەت كورسەتۋگە قاتىستى سوتقا دەيىنگى تەرگەۋ امالدارىن باستادى»، - دەلىنگەن حابارلامادا.
سونداي-اق، ەلوردا پوليتسياسىنان ق ر قىلمىستىق-پروتسەستىك كودەكسىنىڭ 201-بابىنا سايكەس، وزگە مالىمەتتەر جاريا ەتۋگە جاتپايتىنى ەسكەرتىلدى.
ەسكە سالساق، كەشە استاناداعى مەكتەپتە وقۋشىنىڭ ۇستىنە فۋتبول قاقپاسى قۇلاپ، 10 جاسار بالا مەرت بولعانى تۋرالى حابارلاعان ەدىك. ءبىلىم باسقارماسىنىڭ اقپاراتىنا سايكەس، وقيعا №10-مەكتەپتىڭ اۋماعىندا بولعان. بالا العان جاراقاتىنان سول جەردە كوز جۇمعان.
