كونسۋلدىقتار قانداستاردىڭ وتىنىشتەرىن «ءبىر تەرەزە» قاعيداتىمەن قاراي باستادى
بۇل تۋرالى ۇكىمەت وتىرىسىندا كوشى-قون ساياساتى تۇجىرىمداسىن ىسكە اسىرۋ بارىسىن تالقىلاۋ كەزىندە پرەمەر-ءمينيستردىڭ ورىنباسارى- ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
«1-شىلدەدەن باستاپ قازاقستاننىڭ كونسۋلدىقتارى شەتەلدەگى قانداستارىمىزدىڭ وتىنىشتەرىن «ءبىر تەرەزە» قاعيداتى بويىنشا قاراي باستادى. قانداستاردى ەلگە قونىستاندىرۋدىڭ جاڭا الگوريتمى جاسالىپ، ول 4 سانات بويىنشا جۇرگىزىلە باستادى. بىرىنشىدەن، جۇمىس بەرۋشىلەردىڭ سۇرانىسى بويىنشا قاجەت كاسىپ يەلەرىن تارتۋ. مۇنداي سۇرانىس جۇمىس كۇشى جەتپەي جاتقان بارشا وڭىرلەردىڭ جۇمىس بەرۋشىلەرىنەن ءتۇسۋى مۇمكىن، بۇل رەتتە قانداستارىمىز سول جۇمىس بەرۋشىنىڭ لوكاتسياسىنداعى وڭىرگە جىبەرىلەتىن بولادى»، - دەدى ت. دۇيسەنوۆا.
ەكىنشىدەن، قانداستارىمىزدىڭ اتا-اناسى نەمەسە بالالارى ەرتەرەك كەلىپ، ازاماتتىق الىپ، بەلگىلى ءبىر كاسىپپەن اينالىسىپ جۇرگەن بولسا، وندا شەت ەلدىك قانداستارىمىز ولار تۇرىپ جاتقان جەرگە وتباسىمەن، تۋىستارىمەن قاۋىشۋ ماقساتىندا كوشىپ كەلۋى مۇمكىن. ۇشىنشىدەن، وڭىرلەر ءوز تەرريتورياسىندا دامۋ الەۋەتى بار ەلدى مەكەندەردى انىقتاپ، سول جەرلەرگە دەموگرافيالىق ۇدەرىستى كۇشەيتۋ ماقساتىندا قانداستارىمىزدى شاقىرۋ مۇمكىن.
«تورتىنشىدەن، ۇكىمەت ايقىنداعان وڭىرلەرگە جولداما بەرۋ ءتارتىبى بار. ايتا كەتەتىن ءجايت، الەۋمەتتىك پاكەت تەك ءتورتىنشى، ياعني ۇكىمەت ايقىنداعان وڭىرلەرگە جولداما العان قانداستارىمىزعا عانا بەرىلەدى. جىل باسىنان بەرى قازاقستانعا 13569 قانداس باۋىرىمىز كەلدى، ونىڭ 8547 سى ەڭبەككە قابىلەتتى. ولار الەۋمەتتىك قولداۋ جانە بەيىمدەۋ، جۇمىسقا ورنالاستىرۋ شارالارىمەن قامتىلعان»، - دەدى مينيستر.
بۇدان بۇرىن حابارلانعانداي، قازاقستانعا نەگىزىنەن قاي ەلدىڭ ازاماتتارى قونىس اۋدارىپ جاتقانى انىقتالدى.
