كورەيالىق جىگىت قازاق اندەرىن ورىنداپ ءجۇر - ۆيدەو

ءوزى قازاقستاندا تۇرۋعا نيەتتى. دومبىرا شەرتۋدى دە ۇيرەنىپ الىپتى، دەپ حابارلادى «حابار 24» ارناسى.
سون ۆون سوب - كورەي جىگىتى. سەۋلدە تۇرادى. قازاقپەن ءۇش قايناسا سورپاسى قوسىلمايدى. ءبىراق قازاقستاندا بولىپ، ءبىراز جەردى ارالاعان. كورگەن. سونىڭ ارقاسىندا قازاقتىڭ جانىن دا تۇسىنۋگە تىرىستى. ال ءشامشىنىڭ ءانىن كورەيشە شىرقاعاندا، قازاق تۇرماق، شەت جۇرتتىقتار دا تامسانىپ، تاڭداي قاعادى. ونەردىڭ قۇدىرەتى شەكسىز.
«سىعان سەرەناداسى ءانىنىڭ سوزدەرىن كورەي تىلىنە اۋدارۋ قيىن بولدى، ونىڭ ماعىناسى كۇردەلى. ءان مەنى ءومىر تۋرالى ويلانۋعا ءماجبۇر ەتتى. مەن سوزدەردى زاماناۋي تۇردە وزگەرتتىم. ولاردىڭ ماعىناسىن وڭتۇستىككورەيالىقتار جاقسى تۇسىنەدى. بيىلعى ماقساتىم - قازاق تىلىندە ءان ايتۋ. وكىنىشكە وراي، تىلدىك كەدەرگى بار»، - دەيدى كورەي ءانشىسى سون ۆون سوب.
سەۋلدىڭ شەتىندەگى سون ۆون سوبتىڭ ءان ستۋدياسى بار. مۇندا ول شەتەل اندەرىن كورەي تىلىنە اۋدارىپ، ورىنداپ، بەينەبايان تۇسىرەدى. ءوزى 36 جاستا. ول 20 جىلىن مۋزىكاعا ارناعان. ونەر ۋنيۆەرسيتەتىندە ترومبون بويىنشا وقىدى. سودان كەيىن انسامبلدە وينادى، K-Pop توبىندا رەپ ايتتى جانە بلوگەر اتاندى. 2015 -جىلدان باستاپ سون ءوزىنىڭ جەكە مانسابىن باستادى. 3 جىلداي بۇرىن وزگە ەلدەردىڭ اندەرىن كورەي تىلىنە اۋدارا باستادى. تىرناقالدىسى - قازاقستاندىق باتىرحان شۇكەنوۆتىڭ كومپوزيتسياسى ەدى. ءقازىر ءانشىنىڭ رەپەرتۋارىندا 15-تەن استام قازاق شىعارماسى بار.
«نەگىزگى تابىسىم - جارناماعا مودەل رەتىندە ءتۇسۋ. كورەيادا مەن مۋزىكا جازامىن، بەينەباياندار شىعارامىن. ازىرگە كاۆەرلەردەن تابىس تاپپايمىن، ءبىراق كىم ءبىلسىن، قازاقستانعا جۇمىس ىستەۋگە باراتىن شىعارمىن. كاۆەر ەمەس، قازاق تىلىندە جاڭا ءان جازعىم كەلەدى. الماتىدا، استانادا، شىمكەنتتە، پەتروپاۆلدا، اقتاۋدا بولدىم. ءوزىمدى ءارتۇرلى ەلدەردە جۇرگەندەي سەزىندىم، ءار قالانىڭ ءوز ايىرماشىلىعى بار»، - دەيدى سون ۆون سوب.
سون ازىرگە ءسۇربويداق. مۋزىكانى جانى سۇيگەنىمەن ءوز داۋىسىنا كوڭىلى تولمايدى. ال مۋزىكا اكەسىنەن دارىعان بولۋى كەرەك. سەبەبى اكەسى ءانشى. ال پروديۋسەرى - ءوزىنىڭ سىنىپتاسى.
«مەكتەپتەگى ۆون سوبتىڭ لاقاپ اتى توم كرۋز بولدى. ويتكەنى ول قىزداردىڭ اراسىندا تانىمال بولدى. مەن قازاقستاندا ۆون سوبتىڭ جانكۇيەرلەرىنىڭ كوپ ەكەنىنە تاڭعالدىم، مۇنداي جىلى قارسى الۋدى كۇتپەگەن ەدىم. العاشقى ساپاردا سۋىق بولدى، ءبىز قىستا باردىق. ماعان تاماعى ۇنادى. ادامدارى اشىق، مەيىرىمدى»، - دەيدى پروديۋسەر سەون سى چحان.
كاۆەرلەر ايتۋ ۆون سوبقا تابىس اكەلگەن جوق. ءبىراق سوندا دا بۇل ءىستى تاستاپ كەتكىسى جوق. الداعى ەكى ايدا سون ۆون سوب قازاقستانعا 2 ساپار جوسپارلاپ وتىر. ءانشى كونسەرت بەرىپ، ءارى حالىقارالىق مۋزىكا فەستيۆالىنە قاتىسۋعا اسىق.