ق ر س ءى م يراك تۇرمەسىندە وتىرعان قازاقستاندىق ايەلدەردىڭ جاعدايىن ايتتى

استانا. قازاقپارات – ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ يراك تۇرمەسىندە وتىرعان قازاقستاندىق ايەلدەردىڭ جاي- كۇيى تۋرالى ايتتى، دەپ حابارلايدى قازاقپارات.

مامىر ايىندا يراك تۇرمەسىندە ءومىر بويىنا باس بوستاندىعىنان ايىرىلعان قازاقستاندىق ايەلدەر اشتىق جاريالاعان ەدى.

«داۋ شىققاندا ءبىزدىڭ ەلشىلىك يراككا بارىپ، ەل بيلىگىمەن، بىرنەشە جوعارى لاۋازىمدى وكىلمەن كەزدەستى. ولار بۇل ماسەلەنى ءجىتى تالقىلاپ، ءمان- جاعدايدى انىقتادى. ءومىر بويىنا باس بوستاندىعىنان ايىرۋ جازاسى بەرىلگەندەر ەش راقىمشىلىققا ىلىنبەيدى ەكەن. سوندىقتان ءبىزدىڭ ازاماتشالار اشتىقتى توقتاتتى، قازىر سول تۇرمەدە جازاسىن وتەپ جاتىر. ءبىراق، قازاقستان تاراپى ەلشىمىز ارقىلى ءوز نارازىلىعىمىزدى جەتكىزدىك، كەلەشەكتە قانداي دا ءبىر مۇمكىندىك بولسا، سول ازاماتتارىمىزدى ەلگە اۋىستىرۋ نەمەسە راقىمشىلىق جاساۋ تۋرالى ءوتىنىش بىلدىرەدى. بۇل ماسەلە ءبىزدىڭ ەرەكشە باقىلاۋىمىزدا، ازىرگە قالىپتى جاعدايدا»، - دەدى ايبەك سمادياروۆ مينيسترلىكتىڭ اپتالىق بريفينگىندە.

بۇدان بۇرىن حابارلانعانداي، 2019 -جىلدىڭ قاراشاسىندا يراكتان 14 بالا قازاقستانعا جەتكىزىلدى. الايدا ولاردىڭ انالارى ءومىر بويىنا باس بوستاندىعىنان ايىرىلىپ، باعدات (يراك) تۇرمەسىندە جازاسىن وتەۋگە قالدى.