الماتىلىق جاس جىگىت كىتاپحانا جۇمىسىنىڭ ءبىرىڭعاي جۇيەسىن ويلاپ تاپتى
QAZAQ MURA دەپ اتالاتىن كىتاپحانالىق جۇمىستى اۆتوماتتاندىرۋ جۇيەسى بۇگىندە قولدانىسقا ەنىپ تە ۇلگەردى. قازاقپارات ءتىلشىسى جاڭا پلاتفورمانىڭ اياق الىسى مەن ماڭىزدىلىعى تۋرالى اتالمىش سيفرلى كىتاپحانا جۇيەسىنىڭ تەڭ قۇرىلتايشىسى IT- مامانى مۇقاتاي مالىكپەن سۇقباتتاسقان ەدى.
- مۇقاتاي مارات ۇلى QAZAQ MURA- كىتاپحانالىق جۇمىستى اۆتوماتتاندىرۋ جۇيەسىن بىلۋىمشە، ءسىز قۇردىڭىز. بۇگىندە جوبا ينۆەستورلار تاراپىنان 20 ميلليون دوللارعا باعالانعانى راس پا؟
- مەن ءوزىم IT- مامانىمىن. ستۋدەنتتىك كەزدەن سايت جاساۋ، موبيلدى قوسىمشالاردى ازىرلەۋمەن اينالىسامىن. بالا كەزدەن كىتاپ وقۋعا قۇمارمىن. الايدا مەكتەپ كەزىنەن وقىعىم كەلگەن كىتاپتاردىڭ ءوزىمىزدىڭ كىتاپحانالاردا قولجەتىمدى بولا بەرمەيتىن، ولار ەلەكتروندى نۇسقادا بولسا دەگەن وي جىلدار بويى مەنى مازالادى. وسى سۇراقتىڭ جاۋابىن تابۋعا ءبىراز ىزدەندىم دەسەم بولادى. باستى پروبلەمانى ايتا كەتسەم، ەلىمىزدە ءالى كىتاپحانالاردىڭ جۇيەسىنىڭ بىرەگەي ستاردارتى جوق.
مەن بۇل جوبانى قولعا الماس بۇرىن ونى كوممەرتسيالىق ماقساتتان بۇرىن، الەۋمەتتىك جوبا دەپ قاراستىردىم. سەبەبى جاس مامان رەتىندە ەلىمىزدىڭ ءبىلىم سالاسىنىڭ وركەندەۋىنە، بالالاردىڭ زاماناۋي تالاپتارعا نەگىزدەلە وڭتايلى شەشىمدەرمەن ءبىلىم الۋىنا ءوزىمنىڭ ۇلەسىمدى قوسقىم كەلدى. بۇل جوبانى مەن جەكە DIP KZ ج ش س كومپانياسىمەن بىرلەسىپ جاسادىم. بۇگىندە جۇيە ءوز جۇمىسىن باستاپ تا كەتتى. ينۆەستورلار تاراپىنان دا جوبا قوماقتى قارجىعا باعالانعانى دا شىن. بۇگىندە پلاتفورما ءبىزدىڭ ەلمەن قاتار وزبەكستان جانە رەسەي ەلدەرىندە ەنگىزىلىپ جاتىر.
- QAZAQMURA جۇيەسىنىڭ باستى ەرەكشەلىگى نەدە؟
- بۇل كىتاپحانا جۇمىسىن نەگىزگە الا وتىرىپ، جالپى ءبىلىم سالاسىندا مۋلتي شەشىم جاساۋىمىز بولىپ وتىر. ياعني كىتاپحاناشى عانا ەمەس، وقىرماندار، باسپالار مەن ءبىلىم باسقارماسى جۇيەگە قوسىلا الادى. سونىڭ ارقاسىندا جۇيە بارلىق مەكتەپتەردەن شىنايى اقپاراتتار جيناي وتىرىپ، قازاقستان بويىنشا قىسقاشا دەرەكتەردىڭ جيىنىن ۇسىنا الادى. بۇل اقپارات ءوز الدى كەيىن شەشىم قابىلداۋ بارىسىندا ۇلكەن ءرول وينايتىن بولادى. قىسقاشا ايتاتىن بولساق، كىتاپحانا سالاسىن سيفرلاندىرۋ بۇگىنگى ءبىلىم بەرۋدەگى جاڭا نەگىزگى باعىت دەپ ايتۋعا بولادى. باسقا ەرەكشەلىكتەرىن ايتاتىن بولساق، جۇيەنى ءارتۇرلى دەڭگەيدەگى جانە فيليالدارداعى كىتاپحانالاردا پايدالانۋعا ارنالعان. كىتاپحانا اقپاراتىنا نەگىزدەلگەن قۇجات اينالىمى جۇيەسىن پايدالانۋعا جانە كىتاپحانا قورىن باسقارۋعا مۇمكىندىك بەرەدى.
- بۇرىن سوندى مۇنداي سيفرلاندىرىلعان جۇيە ەلىمىزدە بولدى ما؟
- كىتاپحانا جۇمىسىنا بايلانىستى لوكالدى باعدارلامالار عانا بولدى، كوبىندە ولار قازاقستان بويىنشا، رەسەي نەمەسە قىرعىزستاندا جاسالعان باعدارلاما قولدانىلدى جانە ايتارلىقتاي قىمبات بولعان. ءبىزدىڭ جاساپ جاتقان جۇيە تولىق وتاندىق جانە باعاسى جاعىنان قولجەتىمدى. ەڭ باستىسى، قولجەتىمدى اقشاعا لوكالدى ەمەس، تولىق WEB كەز-كەلگەن نوۋتبۋك، كومپيۋتەر كىرە الادى، جۇمىس جەڭىل بولۋ ءۇشىن ios پەن android ءۇشىن قوسىمشا جاسادىق. كىتاپحانادان بولەك، بۇكىل مەكتەپ پەن ءبىلىم قۇرىلىمىن قامتاماسىز ەتەتىن جۇيە ازىرلەدىك. قىسقاشا ايتاتىن بولسام، ءبىزدىڭ ماقساتىمىز- كىتاپحانا سالاسىنداعى نارىقتا كىتاپحانا جۇيەسىن جاڭا دەڭگەيگە كوتەرۋ.
بولاشاقتا ءبىزدىڭ ەلىمىزدىڭ كىتاپحانالارىنىڭ جۇمىسىن جۇيەلى تۇردە جولعا قويۋ ءۇشىن، ءالى دە ءبىراز ەڭبەكتەنۋ كەرەك. بۇل تەك باستاما. بىرلەسكەن جۇمىس ەلىمىزدە ەلەكتروندىق كىتاپتار مەن ەلەكتروندىق كىتاپحانالار نارىعىن دامىتۋعا مۇمكىندىك بەرەدى دەپ ۇمىتتەنەمىن.
- كىتاپحانا جۇمىسىن ءبىر ارناعا توعىستىرۋ قانشالىقتى ءتيىمدى دەپ ويلايسىز؟ QAZAQMURA جۇيەسى كىتاپحانا جۇمىسىنا قالاي اسەر ەتپەك؟
- قازىرگى ۋاقىتتا رەسپۋبليكا بويىنشا بارلىق كىتاپحاناشىلار جۋرنالداردى، اكتىلەردى، تىزىمدەردى، ءتۇرلى ۇلگىدەگى قۇجاتتاردى تولتىرۋدا. ءبىز بارلىق قاعاز جۇمىستارىن الىپ تاستايمىز، قۇجاتتار جۇيەدە جينالعان اقپارات بويىنشا قالىپتاسادى، بولاشاقتا ولاردى جۇكتەپ الۋعا جانە باسىپ شىعارۋعا بولادى. ياعني، كىتاپحاناشىلاردىڭ وزدەرى ۋاقىتتارىن ۇنەمدەيدى، سونىمەن قاتار تولتىرىلعان قۇجاتتار تولعان ارحيۆتەردى دە ۇمىتۋعا بولادى.
اتالعان جۇيە، ياعني كىتاپحاناشىلارعا جانە ولارمەن ارەكەتتەسەتىندەرگە: وقىرماندارعا، مۇعالىمدەرگە، مينيسترلىكتەر مەن ءبىلىم باسقارمالارىنا ارنالعان ءبىرىڭعاي اقپاراتتىق بازانى ىسكە قوسۋ، مونيتورينگ، باعالاۋ، ءبىرتۇتاس جۇمىس فورماتىن قۇرۋ جانە وڭىرلەر شەگىندە رەيتينگ جۇرگىزۋگە مۇمكىندىك بەرەدى. بولاشاقتا كىتاپحانا ءۇشىن بۇل جاڭارتۋ مەن وزگەرىستەر ەنگىزۋگە جول اشادى.
- بۇگىندە پلاتفورما بازاسىندا قانشا كىتاپ (دەرەكقور كولەمى) تىركەلگەن؟
- قازىرگى تاڭدا بيبليوگرافيالىق جازبالار سانى 10000-عا جۋىق، ونىڭ ىشىندە 600 وقۋلىقتار، ال ەلەكتروندىق كىتاپتاردىڭ 150 داناسى بار.
- پلاتفورمانى جۇزە اسىرۋ كەزىندە قانداي دا ءبىر قيىندىقتار تۋىندادى ما؟
- باستى قيىندىق كىتاپحاناشىلاردى دايىنداۋ بولدى، ويتكەنى كوپشىلىگى لوكالدى شەشىمگە ابدەن ۇيرەنىپ قالعان.
- جۇيەنى ىسكە اسىرۋ بارىسىندا قانداي رەسۋرستار پايدالاندىڭىزدار؟
- ءبىر جىل بويى كىتاپحانا سالاسىن ءوزىمىز زەرتتەدىك، الايدا جۇيەنى ازىرلەۋ كەزىندە بىزگە رەسپۋبليكالىق عىلىمي- پەداگوگيكالىق كىتاپحاناسىنىڭ كىتاپحاناشىلارى كوپ كومەكتەستى. بىزگە كىتاپحانالار قالاي جانە قانداي قۇجاتتارمەن جۇمىس ىستەيتىنىن باسىنان اياعىنا دەيىن كورسەتىپ ءتۇسىندىردى.
- بولاشاقتا بۇل جۇيەنىڭ اياق الىسى قالاي بولماق؟
- بۇل تۋرالى ايتۋعا ءالى ەرتە، قازىرشە العا قويعان ماقساتتار مەن مىندەتتەر بار. سوعان وراي ءبىز كوپتەگەن باسقا ينتەگراتسيالىق مۇمكىندىكتەردى قوسقىمىز كەلەدى. دەگەنمەن، ءبارى ءبىزدىڭ تۇتىنۋشىلارىمىزعا جانە ولاردىڭ پىكىرلەرىنە بايلانىستى.
- وقۋشىلار، كىتاپحاناشىلار مەن جالپى وسكەلەڭ ۇرپاق ءۇشىن باستى پايداسىن اتاپ وتە الاسىز با؟
- ەگەر پايداسى مەن مۇمكىندىكتەرىن تالداساق ولار كوپ، ءبىراق نەگىزگىسىن ايتاتىن بولساق: بۇل جۇيەدە از دەگەندە ءبىر جىل جۇمىس ىستەلسە، جينالعان اقپاراتتى تالداۋ نەگىزىندە ەل كىتاپحاناسىن ودان ءارى دامىتۋدىڭ پەرسپەكتيۆالىق جانە ستراتەگيالىق باعىتتارىن، ميسسياسىن، ماقساتتارى مەن مىندەتتەرىن انىقتاۋ مۇمكىندىگى بەرىلەدى. سەبەبى قانداي كىتاپتار شىنىمەن قاجات، سۇرانىس كوپ جانە قانداي كىتاپتارعا ەش نەگىزسىز اقشا ءبولىنىپ، كىتاپحانالاردا تۇرعانىن بىلە الادى.
سونىمەن قاتار ەڭ باستىسى وقۋلىقتار مەن كوركەم ادەبيەت ءۇشىن العاشقى وقۋ قوسىمشاسى بولادى. مالىمەتتەر بازاسىنىڭ ءبىر جەردە بولاتىنى بولاشاق ۇرپاق ءۇشىن وتە ىڭعايلى ءالى بۇگىندە سۇرانىستا.
- بۇل جۇيەنىڭ موبيلدى قوسىمشاسى جايلى ايتىپ كەتسەڭىز؟
- QAZAQMURA جۇيەسى ارقىلى، كىتاپحانانى اۆتوماتتاندىرىپ قانا قويماي، سونىمەن قاتار وقىرماندار ءۇشىن، OQU قوسىمشاسىن ۇسىنىپ جاتىرمىز. OQU- وقىرماندارعا ارنالعان. ول مەكتەپ قورىنا قول جەتكىزۋگە (ىڭعايلى فيلتراتسيا)، QR يدەنتيفيكاتورى (QR كودى پايدالانۋشىلار ءتىزىلىمىنىڭ ىشكى دەرەكقورىمەن بايلانىستى جانە كىتاپحاناشىلارعا پايدالانۋشىنى بىرنەشە سەكۋند ىشىندە تابۋعا، قورداعى كىتاپتارعا وتىنىمدەر تاستاۋعا، كىتاپحانا كارتاسىن باسقارۋعا (كىتاپتى بەرۋ جانە قايتارۋ تاريحى جانە بەرۋ مەرزىمى)، ەلەكتروندى كىتاپتارعا قول جەتكىزۋگە مۇمكىندىك بەرەدى.
وقىرماندار ءۇشىن OQU- بۇل بارلىق اقپارات بار كومەكشى جانە انىقتامالىق، ال كىتاپحاناشىلار ءۇشىن وقىرماندارمەن ءوزارا ارەكەتتەسۋدى جەڭىلدەتەدى.
- سۇقباتىڭىزعا راقمەت!
اۆتور:
الما مۇقانوۆا
