اتىراۋدا كىشكەنتاي بالاقايدىڭ دەنەسى بالاباقشادان كوگەرىپ كەلگەن
اتىراۋ قالاسىنىڭ تۇرعىنى گۇلدەي بيسەكەن قىزىنىڭ بالاسىنىڭ بالاباقشاعا بارعانىنا ەكى اپتا بولعان. ال، 4-تامىزدا بالاباقشادان ارقاسى كوگەرىپ كەلگەن.
«ۇيگە كەلىپ، كيىمىن شەشكەندە ارقاسىن كورىپ، جۇرەگىم ۇشتى. بىردەن بالاباقشاعا بارامىن دەپ تاربيەشىسىنە، ديرەكتورىنا جازدىم. ديرەكتور بالاباقشاعا ورنالاسار كەزدە كامەرا بارىن ايتقان ەدى. ەگەر ءبىر نارسە بولعان جاعدايدا كامەرانى قاراي الاسىزدار دەگەنى بار. ديرەكتور، تاربيەشى، كۇتۋشى، ماسساجيست اپاي بار، ءبارىمىز سويلەستىك. ەندى كامەرا ءوشىپ قالعانىن ايتىپ وتىر. ديرەكتور تاربيەشىنى جاقتاپ، كۇتۋشىگە ىعىستىرىپ وتىر. باستى جاۋاپكەرشىلىك تاربيەشىدە ەمەس پە؟ كامەرا ءوشىپ قالعانىنا كىم جاۋاپتى؟ بارلىق فيليالىندا كامەرانىڭ جۇمىس جاساپ تۇرعانىن كۇندەلىكتى تەكسەرىپ وتىراتىن جاۋاپتى قىزمەتكەر بولۋى كەرەك ەمەس پە؟ جۇمىستارىنا سالعىرت قاراۋ عوي بۇل»، - دەپ جازدى الەۋمەتتىك جەلىدە گۇلدەي بيسەكەن قىزى.
وبلىس اكىمىنىڭ ورىنباسارى جاسۇلان بيسەمبيەۆ اتالعان جايتتىڭ باقىلاۋعا الىنعانىن حابارلادى.
«اتىراۋداعى «زەينەپ ءامينا» بالاباقشاسىنداعى جاعدايعا بايلانىستى ماسەلەنىڭ ءتيىستى ورىندار باقىلاۋىندا ەكەندىگىن ايتقىم كەلەدى. قازىرگى ۋاقىتتا جاعدايدى جان-جاقتى زەردەلەۋ بويىنشا اتىراۋ وبلىستىق ءبىلىم بەرۋ باسقارماسى، اتىراۋ قالالىق ءبىلىم بولىمىنە تاپسىرمالار بەردىم. بالا قۇقىعى جانە قاۋىپسىزدىگى باستى نازاردا بولۋى كەرەك. سوندىقتان، بالامەن جۇمىس جاسايتىن كەز كەلگەن ورتالىق ەڭ الدىمەن جاۋاپكەرشىلىكتى سەزىنۋى ءتيىس»، - دەپ حابارلادى جاسۇلان بيسەمبيەۆ.
