قازاقستان مينيسترلەرى قانداي كولىكپەن جۇرەدى

استانا. قازاقپارات - ەلىمىزدە تامىزدىڭ ءبىرىنشى جەكسەنبىسى كولىك قىزمەتكەرلەرى كۇنى بولىپ بەلگىلەنگەن.

كاسىبي مەرەكە قارساڭىندا قازاقپارات اگەنتتىگى مەملەكەتتىك ورگاندارعا كولىك قىزمەتىن ۇسىناتىن ق ر پرەزيدەنتى ءىس باسقارماسىنىڭ اۆتوشارۋاشىلىعىنا قوناققا باردى. مۇندا ساپالى جانە قاۋىپسىز كولىك قىزمەتى ءۇشىن بارلىق قاجەتتى ينفراقۇرىلىم جاسالعان.

مۇنداي ماڭىزدى سالادا ايەلدەردىڭ دە ەڭبەگى وراسان. اۆتوشارۋاشىلىق ديرەكتورىنىڭ پايدالانۋ جونىندەگى ورىنباسارى سۆەتلانا باكيجانوۆا تىلشىلەردى كۇتىپ الىپ، مەكەمەنىڭ جۇمىسىمەن تانىستىردى. سۆەتلانا ايتباي قىزى اۆتوشارۋاشىلىق سالاسىندا 15 جىلدان استام ەڭبەك ەتىپ كەلەدى. كەيىپكەرىمىز ەڭبەك ەتكەن جىلدارى ديسپەتچەر، مامان، ءبولىم باسشىسى ساتىلارىنان ءوتىپ، ديرەكتوردىڭ ورىنباسارى لاۋازىمىنا دەيىن كوتەرىلگەن.

جۇرگىزۋشىلەر جۇمىسى تاڭعى 6-دا باستالادى

«ءبىزدىڭ ۇجىم مەملەكەتتىك ورگاندارعا، سونىمەن قاتار مينيسترلەرگە، ۆيتسە-مينيسترلەرگە، اگەنتتىك باسشىلارىنا، شەتەلدىك دەلەگاتسيالارعا، سونداي-اق وزگە دە جەكە جانە زاڭدى تۇلعالارعا جوعارى ساپالى جانە قاۋىپسىز كولىك قىزمەتىن ۇسىنادى. مينيسترلەردىڭ ماڭىزدى شەشىم قابىلداۋى ءۇشىن، قاجەتتى ورىندارعا بارۋى ءۇشىن كولىك كەرەك. شەتەلدىك دەلەگاتسيالار كەلگەندە دە پروتوكول بويىنشا جوعارى كلاستى كولىكتەر بەرىلۋى ءتيىس. ەلىمىزدىڭ ءيميدجى ءۇشىن بۇل وتە ماڭىزدى»، - دەيدى سۆەتلانا باكيجانوۆا.

اۆتوشارۋاشىلىق اۋماعى 3,2 گەكتارعا جەتەدى. بۇل اۋماقتا 3 قاباتتى گاراج، كەڭسە، مەديتسينالىق بەكەت، جوندەۋ- مەحانيكا ءبولىمى، كولىك جۋاتىن ورىن، ءتىپتى جانارماي قۇياتىن ارنايى كولونكالار دا قويىلعان. بۇل نىساندى ق ر ىشكى ىستەر مينيسترلىگىنىڭ پوليتسيا پولكى تاۋلىك بويى كۇزەتەدى.

كولىك جۇرگىزۋشىلەرىنىڭ جۇمىس كۇنى تاڭعى 6-دا باستالادى. ولار جەلىگە شىعار الدىندا مىندەتتى تۇردە مەديتسينالىق تەكسەرۋدەن وتەدى، قان قىسىمى ولشەنىپ، الكوگول ىشكەن-ىشپەگەنى تەكسەرىلەدى.

كاسىپورىننىڭ ىسكەرلىك ەتيكا جونىندەگى كودەكسىنە سايكەس جۇرگىزۋشىلەر اق جەيدە، كوستيۋم كيىپ، گالستۋك تاعادى. ماشينا دا جۋىلعان، تازا، ارتىق ءيىسسىز بولۋى قاجەت. كۇن سايىن قاداعالاۋ- وتكىزۋ بەكەتىندەگى مەحانيكتەر كولىك پەن جۇرگىزۋشىنى تەكسەرىپ، جانارمايىن تولتىرىپ، سودان كەيىن عانا جەلىگە شىعارادى.

وسىلايشا، كۇن سايىن 330 كولىك جولعا شىعىپ، مەملەكەتتىك ورگان وكىلدەرىن تاسيدى. تۇنگى ۋاقىتتا 6-7 كولىك كەزەكشىلىك ەتەدى.

وتاندىق وندىرىسكە باسىمدىق بەرىلەدى

اۆتوشارۋاشىلىق گاراجىندا ءتۇرلى ماركاداعى 400-گە جۋىق كولىك بار. جىل باسىنان بەرى كيا ك9، Hyundai H350 سىندى 20 كولىك ساتىپ الىنعان.

«نەگىزىنەن كوپ جاعدايدا قازاقستاندا جاسالعان كولىكتەردى الۋعا تىرىسامىز. بىرتىندەپ وتاندىق وندىرىسكە كوشىپ جاتىرمىز دەۋگە بولادى. اسىرەسە رەسمي ءىس-شارالارعا جوعارى كلاستى كولىكتەرىمىز بار. Yutong ماركالى اۆتوبۋستارىمىز دا قاراعاندى وبلىسىنىڭ ساران قالاسىنان جەتكىزىلگەن»، - دەپ ءتۇسىندىردى س. باكيجانوۆا.

سونداي-اق، قاۋىپسىزدىك ماقساتىندا مەملەكەتتىك كۇزەت قىزمەتىمەن قورعالاتىن تۇلعالارعا بروندالعان كولىكتەر بەرىلەدى.

كولىكتى جەكە ماقساتتا قولدانۋعا بولمايدى

ديسپەتچەرلەر كەلىپ تۇسكەن وتىنىمدەردى تىركەيدى، جۇرگىزۋشىلەرگە باعىت- باعدار بەرىپ وتىرادى. اي سوڭىندا قۇجاتتاما جاسالىپ، قاي مينيسترلىكتىڭ قانشا رەت كولىك شاقىرعانى، قانشا شاقىرىم جۇرگەنى جازىلادى. ولاردىڭ بارلىعىنا بەلگىلى ءبىر ليميت قويىلعان.

«ءبىزدىڭ كولىكتەردىڭ ءنومىرى بىردەن كوزگە تۇسەدى، سوندىقتان كولىكتى جەكە سەبەپتەرمەن قولدانۋىنا، بالاباقشا، مەيرامحانا، ساۋدا ورتالىقتارىنا بارۋعا رۇقسات جوق. قالا سىرتىنا دا شىعارىلمايدى، ءبارى قاتاڭ تەكسەرىلەدى. ارينە، جۇمىس بابىمەن، نە ءىسساپارعا شىقسا، بىزگە الدىن الا ەسكەرتەدى. ءبارىن باقىلاپ وتىرامىز»، - دەيدى اۆتوشارۋاشىلىق وكىلى.

ءاربىر جۇرگىزۋشى وزىنە بەكىتىلگەن كولىكتىڭ تازالىعىنا، تۇتاستىعىنا، كەشىكپەي جۇمىس ىستەۋىنە جاۋاپ بەرەدى. كۇندەلىكتى اۋىسىمنان كەيىن كولىكتەر مىندەتتى تۇردە جۋىلادى. جۋىلماعان كولىك پاركينگ اۋماعىنا كىرگىزىلمەيدى.

سونىمەن بىرگە، قولدانىستان شىققان كولىكتەر كاسىپورىننىڭ جارعىسىنا سايكەس باسقا مەملەكەتتىك ورگاندارعا، وبلىستاردىڭ اكىمدىكتەرىنە وتەۋسىز جىبەرىلەدى.

«كولىكتەر شامامەن 7 جىل قولدانىستا بولعاندىقتان قاۋىپسىزدىك ماقساتىندا جاڭا كولىكتەرگە اۋىستىرۋعا تىرىسامىز. قولدانىستان شىققان كولىكتەردى مەملەكەتتىك مۇلىك جانە جەكەشەلەندىرۋ كوميتەتى ارقىلى وڭىرلەردەگى اكىمدىكتەرگە وتەۋسىز نەگىزدە بەرەمىز. جىل باسىنان بەرى مەرزىمى اياقتالعان 50 كولىكتى وبلىستارعا جىبەردىك»، - دەيدى سپيكەر.

جۇرگىزۋشىلەر قالاي ىرىكتەلەدى؟

اۆتوشارۋاشىلىقتا 244 جەكە جۇرگىزۋشى، 72 كەزەكشى جانە 53 اۆتوبۋس جۇرگىزۋشىسى جۇمىس ىستەيدى. ولاردى ىرىكتەۋ وتە قاتاڭ جۇرگىزىلەدى، بىلىكتىلىگى جوعارى، ەڭ تاجىريبەلى ماماندار عانا جۇمىسقا قابىلدانادى. سوندىقتان دا جۇرگىزۋشىلەردىڭ ورتاشا جاسى - 30-دان جوعارى.

اۆتوشارۋاشىلىقتىڭ قاۋىپسىزدىك قىزمەتى كەزەڭ- كەزەڭىمەن جۇرگىزۋشىلەردىڭ ءبىلىمى مەن تاجىريبەسىن تەكسەرىپ وتىرادى. ول ءۇشىن جولدا ءجۇرۋ ەرەجەسى بويىنشا تەست تاپسىراتىن كومپيۋتەرلەر مەن ارنايى تاپسىرىسپەن جاسالعان كولىك جۇرگىزۋ ترەناجەرى تۇر.

«جۇمىسقا قابىلدانعىسى كەلگەن ۇمىتكەرلەر دە وسى تەكسەرۋدەن وتەدى، ەڭ جوعارى ۇپاي جيناعان ادامدارعا باسىمدىق بەرەمىز. مەحانيكتەرىمىز دە كەزەكشى كولىكتى شىعارىپ، ۇمىتكەردى رۋلگە وتىرعىزىپ، قالانى ارالاپ كەلەدى. كاسىبي ماماندار تاجىريبەلى ۇمىتكەردى بىردەن بايقايدى. سوندىقتان دا ءبىزدىڭ جۇرگىزۋشىلەرگە ەش شاعىم ايتىلمايدى، جول اپاتى دا وتە سيرەك، وندا دا باسقا جۇرگىزۋشەردىڭ كىناسى انىقتالىپ جاتادى»، - دەيدى سۆەتلانا حانىم.

ونىڭ ايتۋىنشا، جاڭا ماماندارعا تالىمگەر رەتىندە تاجىريبەلى جۇرگىزۋشىلەر بەكىتىلەدى. وسىلايشا، ۇجىم اراسىنداعى ساباقتاستىق، ۇيىمشىلدىق، كاسىبيلىك ساقتالادى.

سونىمەن بىرگە، كاسىپورىن قىزمەتكەرلەرىنە ءتۇرلى الەۋمەتتىك قولداۋ كورسەتىلەدى. باسپاناسى جوقتارعا قىزمەتتىك پاتەر بەرىلەدى نەمەسە جاڭا پاتەر الۋعا ماتەريالدىق قولداۋ كورسەتىلەدى.

«جالاقى كەشىكتىرىلمەي، تۇراقتى تۇردە بەرىلەدى. بارلىق الەۋمەتتىك تولەمدەر جاسالادى. كورپوراتيۆتىك رۋحتى كوتەرۋ ءۇشىن شاحمات، فۋتبول، ۆولەيبولدان تۋرنيرلەر مەن جارىستار ۇيىمداستىرامىز. جاتتىعۋ زالى بارىنە قولجەتىمدى. مەرەكەلىك كونسەرتتەرگە دە بەلسەندى قاتىساتىن ونەرلى ماماندارىمىز بار»، - دەيدى س. باكيجانوۆا.

اۆتور:

ايجان سەرىكجان قىزى