پەتروپاۆلدا ۇلتارالىق الاۋىزدىقتى قوزدىرعان ەر ادام پسيحياتريالىق ستاتسيوناردا ءماجبۇرلى تۇردە ەمدەلەدى

ماماندار ونىڭ ەسى دۇرىس ەمەستىگىن انىقتادى. سوتتىڭ ۇكىمىمەن ول ەندى پسيحياتريالىق اۋرۋحانادا ەم قابىلدايدى، دەپ حابارلايدى قازاقپارات ءتىلشىسى.
پەتروپاۆل قالالىق سوتىنىڭ مالىمەتىنشە، 4 -تامىزدا پەتروپاۆل قالالىق سوتى ۇلتارالىق الاۋىزدىقتى قوزدىرۋ، ازاماتتاردىڭ ۇلتتىق ار-وجدانى مەن قادىر-قاسيەتىن قورلاۋ، سونداي-اق قازاقستان رەسپۋبليكاسىنىڭ تۇتاستىعىن بۇزۋعا جاريا تۇردە شاقىرۋ بابى بويىنشا ل. -عا قاتىستى ءىستى قارادى.
ەر ادام 2014-جىلدان 2022-جىلعا دەيىنگى كەزەڭدە ۇيالى تەلەفون ارقىلى «Facebook» الەۋمەتتىك جەلىسىندە قازاق، ورىس ۇلت وكىلدەرىنىڭ اراسىندا الاۋىزدىقتى قوزدىرۋعا باعىتتالعان رەپوستتار مەن پىكىرلەر جاريالاپ وتىرعان. سونداي-اق ەل تۇتاستىعىن بۇزۋعا شاقىرعان جازبالار جازعان، وسىلايشا جەلى قولدانۋشىلارى اراسىندا نەگاتيۆ تۋدىرعان. كەيىن ونىڭ اۋىراتىندىعى، بۇل جازبالاردى جازعان ۋاقىتتا ەسى دۇرىس ەمەس كۇيدە بولعاندىعى انىقتالعان.
پروكۋرور ل. -دى ق ر ق ك 174-بابىنىڭ 1-بولىگى، 180-بابىنىڭ 2-بولىگىندە كورسەتىلگەندەي - قوعامدىق قاۋىپتى ارەكەتتەردى ەسى دۇرىس ەمەس كۇيدە جاساعانى ءۇشىن قىلمىستىق جاۋاپتىلىقتان بوساتىپ، جالپى ۇلگىدەگى پسيحياتريالىق ستاتسيوناردا ماجبۇرلەپ ەمدەۋ تۇرىندەگى شارانى قولدانۋدى سۇرادى.
پسيحيكالىق كۇيىنە بايلانىستى، ل. سوت وتىرىسىنا قاتىسقان جوق.
سوت ل. - ءدىڭ زاڭمەن تىيىم سالىنعان ارەكەتتەردى ەسى دۇرىس ەمەس كۇيدە جاساعانى دالەلدەندى دەپ تانىپ، جالپى ۇلگىدەگى پسيحياتريالىق ستاتسيوناردا ماجبۇرلەپ ەمدەۋ تۇرىندەگى مەديتسينالىق سيپاتتاعى ماجبۇرلەۋ شاراسىن قولداندى. ياعني قىلمىستىق جاۋاپتىلىقتان بوساتتى.