قۇلسارى قالاسىنداعى توبەلەستەن سوڭ ءۇش كۇدىكتى قاماۋعا الىندى

قۇلسارى - جىلىوي اۋدانىنىڭ ورتالىعى بولعانىمەن، اتىراۋ وبلىسىنداعى جالعىز مونوقالا. قازىر 65 مىڭنان استام تۇرعىنى بار مونوقالا بىرنەشە شاعىن اۋدان مەن اۋىلعا بولىنگەن.
توبەلەس تۋرالى الەۋمەتتىك جەلىدە ۆيدەو جۇكتەلدى.
اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ راستاعان اقپاراتقا قاراعاندا، ءتۇن ورتاسىنداعى توبەلەس 19-20 جاستاعى جىگىتتەر اراسىندا بولعان.
«تۇنگى ساعات 03:00 شاماسىنداعى توبەلەستەن 2004-جىلعى جىگىت ءتۇرلى دەنە جاراقاتىن العان. توبەلەسكە قاتىسىپ، قۇقىق بۇزۋشىلىققا جول بەرگەن بارلىق جىگىت انىقتالىپ، ۇستالدى. كۇدىكتى رەتىندە 2003 جانە 2004-جىلعى ءۇش كۇدىكتى قاماۋعا الىندى» دەپ حابارلادى دەپارتامەنتتىڭ باسپا ءسوز قىزمەتى.
جىلىوي اۋداندىق پوليتسيا ءبولىمىنىڭ قىزمەتكەرلەرى ق ر قىلمىستىق كودەكسىنىڭ 106-بابىنىڭ 2-بولىگىمەن (دەنساۋلىققا قاساقانا اۋىر دەنە جاراقاتىن سالۋ) جانە 293-باپپەن (بۇزاقىلىق) سوتقا دەيىنگى تەرگەۋ امالدارىن جۇرگىزىپ جاتىر. وزگە اقپارات ق ر قىلمىستىق پروتسەستىك كودەكسىنىڭ 201-بابىنا سايكەس جاريالاۋعا جاتپايدى.