قازاقستان ەكونوميكاسىندا الماتى قالاسىنىڭ الاتىن ورنى قانداي

ساۋدا، وڭدەۋ ونەركاسىبى، كولىك پەن قويمالاۋ - ەكونوميكالىق ءوسىمنىڭ درايۆەرى بولدى، دەپ حابارلايدى قازاقپارات ءتىلشىسى.
بۇعان دەيىن قاسىم-جومارت توقايەۆ شاھاردى وركەندەتۋگە قاتىستى بىرنەشە باعىتتا اتقارىلۋعا ءتيىس جۇمىستارعا نازار اۋدارعان بولاتىن.
مەملەكەت باسشىسىنىڭ ايتۋىنشا، ەڭ الدىمەن، قالا ەكونوميكاسىن ءارتاراپتاندىرۋ ارقىلى ونىڭ تۇراقتى دامۋىن قامتاماسىز ەتۋ قاجەت. الماتى - ەلىمىزدىڭ ەكونوميكالىق دامۋىنىڭ قوزعاۋشى كۇشى جانە كوشباسشىسى. جالپى ىشكى ءونىمنىڭ بەستەن ءبىر بولىگى، بيۋدجەت كىرىسىنىڭ 25 پايىزدان استامى جانە قازاقستاننىڭ ساۋدا وپەراتسيالارىنىڭ ۇشتەن ءبىر بولىگى وسى قالاعا تيەسىلى.
«ەكونوميكانىڭ ءارتاراپتاندىرىلۋ دەڭگەيىنىڭ تومەن بولۋى قالا تۇرعىندارى تابىسىنىڭ ءوسىمىن باياۋلاتادى. قالا «ورتاشا تابىس تۇزاعىنا» ءتۇستى، ودان شىعۋ ءۇشىن قالا ەكونوميكاسىن تۇبەگەيلى ءارتاراپتاندىرۋ قاجەت. وڭدەۋ ونەركاسىبىن، تۋريزمدى، IT سەكتورىن جانە كرەاتيۆتى يندۋستريانى دامىتۋعا باسا نازار اۋدارۋ كەرەك. باسەكەلەستىكتى ىنتالاندىرۋ، ينۆەستيتسيا تارتۋ جانە ەڭبەك ونىمدىلىگىن ايتارلىقتاي ارتتىرۋ قاجەت. قالا جاعدايىنداعى وڭدەۋ ونەركاسىبىن دامىتۋ ءىسى ەكولوگيالىق تازا جانە ىقشامدى زاماناۋي تەحنولوگيالاردى قولدانا وتىرىپ، ۇدەرىستەردى جوعارى دەڭگەيدە اۆتوماتتاندىرۋمەن جانە تسيفرلاندىرۋمەن قاتار جۇزەگە اسىرىلۋى كەرەك. الماتىنىڭ يندۋستريالىق ايماعى مەن «الاتاۋ» يننوۆاتسيالىق تەحنولوگيالار پاركىنىڭ الەۋەتىن تولىق پايدالانۋ قاجەت»، - دەگەن ەدى پرەزيدەنت الماتى جۇرتشىلىعىمەن كەزدەسۋ بارىسىندا.
مەملەكەت باسشىسىنىڭ تاپسىرماسىن باسىمدىققا الا وتىرىپ، الماتىدا مەملەكەتتىك جانە قالالىق باعدارلامالار اياسىندا 3 مىڭنان استام جوبانى قولداۋ ءۇشىن بيىل 44 ميلليارد تەڭگە ءبولىندى.
قىسقا مەرزىمدە ەكونوميكالىق ينديكاتور 122,2 پايىزعا دەيىن، جىلدىق ينفلياتسيانىڭ باياۋلاۋى اياسىندا ىسكەرلىك بەلسەندىلىك يندەكسى 58,7 پايىز تارماققا دەيىن جەدەلدەدى. ساۋدا، وڭدەۋ ونەركاسىبى، كولىك پەن قويمالاۋ - ەكونوميكالىق ءوسىمنىڭ درايۆەرى بولدى.
قالادا جىل باسىنان بەرى ىسكەرلىك بەلسەندىلىكتىڭ ايتارلىقتاي ءوسۋى بايقالادى. بيىلعى جىلدىڭ ءبىرىنشى توقسانىندا ىسكەرلىك بەلسەندىلىك يندەكسىنىڭ دەڭگەيى بويىنشا (58,7 پايىز) الماتى قازاقستان وڭىرلەرى اراسىندا ءبىرىنشى ورىنعا شىقتى. قىسقا مەرزىمدى ەكونوميكالىق ينديكاتور 23,9 پايىز ارتتى.
وكىلەتتىكتەردى ورتالىقسىزداندىرۋ جونىندەگى مەملەكەت باسشىسىنىڭ تاپسىرماسىن ورىنداۋ بويىنشا، 1 ساۋىردەن باستاپ قالالىق اكىمدىكتىڭ 15 فۋنكتسياسى اۋداندىق اكىمدىكتەرگە بەرىلىپ، ولاردىڭ بيۋدجەتى 2,7 ەسە، ياعني 161,6 ميلليارد تەڭگەگە دەيىن ۇلعايتىلدى.
ەسەپتى كەزەڭدە نەگىزى كاپيتالعا 484 ميلليارد تەڭگە ينۆەستيتسيا تارتىلدى. بۇل رەتتە جەكە ينۆەستيتسيالار 2,7 پايىزعا وسكەن.