ەلوردالىق پوليتسەيلەر زەينەتكەرلەردەن اقشا العان «كۋرەردى» ۇستادى

دروپپەر نەگىزىنەن ەلوردانىڭ قارت تۇرعىندارىنىڭ ۇيىنە بارىپ وتىرعان. 85 جاستاعى ايەل پوليتسياعا ارىزدانىپ، بەلگىسىز جىگىتكە 1 ميلليون 600 مىڭ تەڭگە بەرگەنىن ايتقان.
زەينەتكەردىڭ ايتۋىنشا، وعان ءبىر ەر ادام قوڭىراۋ شالىپ، ءوزىن قۇقىق قورعاۋ ورگانىنىڭ قىزمەتكەرى رەتىندە تانىستىرعان.
سودان كەيىن ول ايەلدىڭ نەمەرەسى جول-كولىك وقيعاسىنا سەبەپشى بولعانىن ايتىپ، جاعدايدى رەتتەۋ ءۇشىن اقشا تالاپ ەتكەن. تۇرعىن اقشانى ۇيىنە كەلگەن كۋرەرگە بەرگەن. الايدا ءبىراز ۋاقىتتان كەيىن بۇنىڭ الاياقتاردىڭ ايلاسى ەكەنىن تۇسىنگەن.
الاياقتار 65 جاستاعى زەينەتكەردى دە الداعان. ايەل دروپپەرگە 1 ميلليون 400 مىڭ تەڭگە بەرىپ جىبەرگەن. وسى سحەما بويىنشا قالانىڭ تاعى ءبىر 85 جاستاعى تۇرعىنى الدانىپ قالدى. ول الاياقتارعا 3 ميلليون 700 مىڭ تەڭگە بەرگەن.
- كۇدىكتى قۇرىقتالدى. تەرگەۋ بارىسىندا ونىڭ Telegram قوسىمشاسىندا حابارلاندىرۋ كورىپ، سول ارقىلى «كۋرەر» بولىپ جۇمىسقا تۇرعانىن انىقتادىق. ول ينتەرنەت-الاياقتارعا الدانعان زەينەتكەرلەردەن اقشا اكەتىپ وتىرعان. قولما-قول اقشانىڭ بەلگىلى ءبىر بولىگىن وزىنە قالدىرىپ، قالعان بولىگىن بانك دەرەكتەمەلەرى ارقىلى شەتەلگە جىبەرگەن. قازىرگى ۋاقىتتا ۇستالعان جىگىت ۋاقىتشا ۇستاۋ يزولياتورىندا، - دەدى استانا قالاسى پ د «الماتى» اۋدانى پ ب اعا جەدەل ۋاكىلى التىنحان مۋحيددينوۆ.