تاشكەنتتە الماتىنىڭ تۋريستىك الەۋەتى تانىستىرىلدى
قازاقستاننىڭ وزبەكستانداعى ەلشىسى بەيبىت اتامقۇلوۆ قۇتتىقتاۋ سوزىندە تۋريزم ەكى ەلدىڭ ەكونوميكالىق ءوسىمى مەن قازاق جانە وزبەك حالىقتارىنىڭ مادەني بىرلىگىنىڭ ماڭىزدى قۇرامداس بولىكتەرىنىڭ ءبىرى ەكەنىن اتاپ ءوتتى. تۋريزم مۇمكىندىكتەرىن دامىتۋ ءۇشىن ەكى ەلدىڭ تۋريزم سەكتورى وكىلدەرى اراسىندا تىكەلەي بايلانىس ورناتۋ قاجەت.
«بۇل ءىس-شارا وزبەك كومپانيالارىنىڭ قازاقستاننىڭ تۋريستىك الەۋەتى تۋرالى كوبىرەك ءبىلۋى ءۇشىن ۇيىمداستىرىلعان. الماتى اسىرەسە تانىمدىق، مادەني، ەكولوگيالىق جانە ىسكەرلىك تۋريزمدى ۇناتاتىن تۋريستەردى قىزىقتىرادى. ماسەلەن، تۇرعىندار «دەمالىس كۇنگى تۋريزم» سياقتى باعىتقا قىزىعۋشىلىق تانىتادى، ول - شوپينگ-تۋريزم، گاسترونوميالىق تۋريزم، مەديتسينالىق تۋريزم جانە تاۋ ءتۋريزمى. مامان رەتىندە سىزدەردىڭ تۋريستىك پاكەتتەردى جاساپ، قىزىعۋشىلىق تانىتقان ازاماتتارعا ۇسىنا الاتىندارىڭىزعا سەنىمدىمىن»، - دەدى بەيبىت اتامقۇلوۆ.
الماتى قالاسى اكىمدىگىنىڭ تۋريزمدى ىلگەرىلەتۋ ءبولىمىنىڭ باسشىسى ەركەبۇلان ءابىحان قوناقتارعا ەلدىڭ قارجى، ەكونوميكالىق، مادەني جانە جاستار ورتالىعى سانالاتىن وڭتۇستىك استاناسىنىڭ تۋريستىك-ينۆەستيتسيالىق الەۋەتىنىڭ تۇساۋكەسەرىن ۇسىندى.
«ءبىز وزبەكستاننان كەلەتىن تۋريستەردىڭ قىزىعۋشىلىعى ۇنەمى ارتىپ وتىراتىندىقتان، بۇل شارانى تاشكەنتتە وتكىزۋدى ۇيعاردىق. وسى جىلدىڭ ءبىرىنشى جارتىجىلدىعىندا عانا الماتىعا 120 مىڭعا جۋىق شەتەلدىك تۋريست كەلدى، ونىڭ 18 مىڭى - وزبەكستاننان كەلگەن قوناقتار. بۇگىن وزبەك استاناسىنىڭ تۋريزم يندۋسترياسىنداعى ارىپتەستەرمەن كەزدەسۋ ءوتتى. ءبىز وزبەك ارىپتەستەرىمىزدى الماتىنىڭ تۋريستىك الەۋەتىمەن تانىسۋ ءۇشىن گاسترونوميالىق، ەكولوگيالىق، تاۋ فەستيۆالدەرىنە، قوناق ءۇي فورۋمدارىنا جانە باسقا دا مادەني-بۇقارالىق ءىس-شارالارعا قاتىسۋعا قىزىقتىرۋدى جوسپارلاپ وتىرمىز. بۇل تۋريستەر اعىنىنىڭ ارتۋىنا ىقپال ەتەدى»، - دەدى جۋرناليستەرگە بەرگەن سۇحباتىندا ەركەبۇلان ءابىحان.
روۋد-شوۋ اياسىندا قازاقستان مەن وزبەكستاننىڭ تۋريستىك سەكتورىنىڭ وكىلدەرى B2B فورماتىنداعى كەزدەسۋلەردە ىنتىماقتاستىقتى كەڭەيتۋدى ڭ وزەكتى ماسەلەلەرى بويىنشا پىكىر الماسىپ، بىرلەسكەن تۋريستىك ونىمدەردى دامىتۋ جانە ىلگەرىلەتۋ سالاسىنداعى ءوزارا ءىس-قيمىل تەتىكتەرىن تالقىلادى.
«قازاقستان - ءبىزدىڭ ەڭ جاقىن كورشىمىز، ءبىزدى تاريحي تۇرعىدان تۇسىنىكتى ورتاق مادەنيەت بايلانىستىرادى. ءبىزدىڭ كومپانيا تۋريستىك يندۋستريا نارىعىندا 15 جىلدان استام ۋاقىت قىزمەت ەتىپ كەلەدى. ءبىز قازاقستاندىق قوناقتارعا، اتاپ ايتقاندا، الماتى قالاسىنان وزبەكستانعا تۇراقتى تۋرلار ۇيىمداستىرىپ كەلەمىز. بۇگىن تۇساۋكەسەر بارىسىندا الماتىعا تەزىرەك كەلۋگە نيەت بىلدىرگەن فانتاستيكالىق ورىنداردى كوردىك. ەندى گاسترونوميالىق، ەكولوگيالىق، تاۋلى، تاريحي-مادەني تۋريزم اياسىندا وزبەكتەرگە ارنالعان تۋريستىك تۋرلاردى كەڭەيتۋدى جوسپارلاپ وتىرمىز. بۇگىنگى شارا وزبەك تۋروپەراتورلارى ءۇشىن جول اشادى، ءبىز قازاقستاندىق ارىپتەستەرىمىزبەن ۇزاقمەرزىمدى جانە ءتيىمدى ىنتىماقتاستىق ورناتۋدى اسىعا كۇتەمىز»، - دەدى Nasibtour تۋريستىك كومپانياسىنىڭ وكىلى نازيما يۋزۋفبەكوۆا.
