مۇحيتتاردىڭ جىلىنۋى ومىرىمىزگە قالاي اسەر ەتەدى؟

عالىمداردىڭ ايتۋىنشا، بۇل كليمات وزگەرۋىنىڭ تاعى ءبىر بەلگىسى. مۇحيتتىڭ جىلىنۋى تۇرمىسىمىزعا قالاي اسەر ەتەدى؟ بيىلعى جازدا اتلانت مۇحيتىنىڭ تەمپەراتۋراسى كوتەرىلدى.
ا ق ش- تىڭ شىعىس جاعالاۋىندا 38 جارىم گرادۋسقا دەيىن ىسىدى. عىلىمدار بۇعان الاڭداپ وتىر. جاڭا دەرەكتەر جاھاندىق جىلىنۋ ەكەنىن كورسەتتى.
مايكل سپەرروۋ، دۇنيەجۇزىلىك مەتەورولوگيا ۇيىمى كليماتتى زەرتتەۋ ءبولىمىنىڭ باسشىسى:
- عالىمدار مۇحيتتىڭ ىسۋى مەن تەڭىزدەگى مۇزدىڭ ازايۋىنا قاتتى الاڭداپ وتىر. ويتكەنى مۇحيتتار كومىرقىشقىل گازدىڭ اۋاعا تارالاتىن جىلۋىنىڭ 90 پروتسەنتىن وزىنە سىڭىرەدى. سولتۇستىك اتلانتيكادا سۋ تىم ىستىق. ءبىزدىڭ بولجامىمىزدان ەداۋىر جوعارى. بۇل ەكولوگيالىق جۇيەگە، بالىق شارۋاشىلىعىنا جانە اۋا رايىنا اسەر ەتەدى.
جەردى كوگىلدىر عالامشار دەپ بەكەر اتاماعان. عالامنىڭ 70 پروتسەنتىن سۋ ايدىنى الىپ جاتىر. سولتۇستىك جارتىشارداعى كليمات نەگىزىنەن مۇحيتقا تاۋەلدى. كومىرقىشقىل گاز ونى جىلىتىپ، مۇزدىقتار ەريدى. ال ەرىگەن تۇشى سۋ سولتۇستىك امەريكا مەن ەۋروپادا جۇمساق اۋا- رايىن قامتاماسىز ەتەتىن ماڭىزدى اعىستاردىڭ اينالىمىن وزگەرتەدى. دانيا عالىمدارىنىڭ بولجامىنشا، 2050 -جىلعا قاراي گولفستريم اعىسىنىڭ جۇيەسى وزگەرەدى. سالدارىنان، ەۋروپانىڭ سولتۇستىك باتىسىندا قۇبىلمالى اۋا- رايى ورنايدى. قىسى سۋىق، جازى قۇرعاق بولادى.
انتونيۋ گۋتەرريش، بۇۇ باس حاتشىسى:
- قازىردىڭ وزىندە كليمات وزگەرىپ جاتىر. بۇل تەك باستاۋى عانا. عالامدىق جىلىنۋ ءداۋىرى اياقتالىپ، عالامدىق قايناۋ ءداۋىرى باستالدى. بۇكىل ەلدەر وسىعان دايىندالىپ، ءوز حالىقتارىن اپتاپتان، جويقىن سۋ تاسقىندارى، داۋىلدار، قۋاڭشىلىق پەن ورتتەردەن قورعاۋى كەرەك. الايدا مۇنداي بولجاممەن كەلىسپەيتىن عالىمدار دا بار. ولار تابيعاتتىڭ توسىن مىنەز كورسەتۋىن قالىپتى قۇبىلىس دەپ سانايدى. دەگەنمەن، بيىلعى شىلدە زەرتتەۋلەر تاريحىنداعى ەڭ ىستىق ماۋسىم بولىپ تىركەلدى.
بەكبولات تۇرماحانوۆ
www.24.kz