قوسشى تۇرعىندارىنىڭ كوبى ەلوردا ەمحانالارىنا جۇگىنۋگە ءماجبۇر - مينيستر

اقمولا وبلىسىنا جۇمىس ساپارىندا قوسشىداعى ءبىرقاتار مەديتسينالىق وبەكتىلەردى ارالاعان دەنساۋلىق ساقتاۋ ءمينيسترى اجار عينيات وسىلاي ايتتى، دەپ حابارلايدى قازاقپارات ۆەدومستۆو سايتىنا سىلتەمە جاساپ.
قوسشى قالاسىنىڭ 1№ قالالىق ەمحاناسىندا جەتى ۋچاسكە بويىنشا 12 مىڭ ادامعا قىزمەت كورسەتىلەدى. كلينيكا باسشىلىعىمەن اڭگىمەلەسۋ بارىسىندا مينيستر مەكتەپ مەديتسيناسى، اۋرۋلاردى ەرتە ساتىسىندا انىقتاۋ ماسەلەلەرىن كوتەرىپ، سان ەمەس، ساپالى پروفيلاكتيكالىق تەكسەرۋلەردىڭ قاجەتتىلىگىن اتاپ ءوتتى. ول كادرلاردى دايارلاۋعا، ولاردى م س ا ك دەڭگەيىندە ۇزدىك تاجىريبەلەرگە ۇيرەتۋگە، جاس دارىگەرلەردى الەۋمەتتىك قولداۋعا نازار اۋداردى.
قالانىڭ 22830 تۇرعىنى تىركەلگەن «جانۇيا» ك س م ك- دە 130 مەديتسينا قىزمەتكەرى، ونىڭ ىشىندە 36 دارىگەر، 68 ورتا بۋىن مامانى مەديتسينالىق كومەك كورسەتەدى، سونداي-اق قۇرامىندا 2 فەلدشەرلىك-اكۋشەرلىك پۋنكت بار. مەديتسينالىق وبەكتىنى ارالاۋ كەزىندە مينيستر باسقارۋداعى تاسىلدەردى وزگەرتۋدى، حالىقپەن جۇمىستىڭ تيىمدىلىگىن ارتتىرۋ، تۇرعىنداردىڭ وتىنىشتەرى بويىنشا باسىم سۇرانىستارىن انىقتاۋ، پەرسپەكتيۆالىق باعىتتاردى اشۋدى ۇسىندى. مىسالى، بۇل تراۆماتولوگيالىق پۋنكت بولۋى مۇمكىن.
قوسشىدا قازىر 80 مىڭنان استام ادام تۇرادى. ولاردىڭ كوبى ءالى دە ەلوردالىق دارىگەرلەرگە جۇگىنۋگە، ياعني استاناعا قاتىناۋعا ءماجبۇر.
«قازىر مۇندا ەكى قالالىق ەمحانا - جەكە جانە مەملەكەتتىك ەمحانا ورنالاسقان. الايدا، وسى مەديتسينالىق ۇيىمدارعا بەكىتىلگەن حالىق سانى - قالا تۇرعىندارىنىڭ جارتىسىنان ءسال استامى عانا. قالعان ادامدار ءالى دە ەلورداعا بارۋعا ءماجبۇر بولىپ وتىر. دەمەك، دەنساۋلىق ساقتاۋ باسقارماسىمەن بىرلەسىپ جەرگىلىكتى تۇرعىندار ءۇشىن مەديتسينالىق قىزمەتتەردى ناقتى قولجەتىمدى ەتۋ ءۇشىن كادرلارمەن قامتاماسىز ەتۋ، تەحنيكالىق جاراقتاندىرۋ ماسەلەلەرىن شەشۋ قاجەت»، - دەدى اجار عينيات.
مينيستر قوسشى قالاسىنىڭ تۇرعىندارىمەن كەزدەسۋ وتكىزدى، سودان كەيىن ازاماتتاردى جەكە قابىلدادى. كەزدەسۋ بارىسىندا جەرگىلىكتى مەديتسينالىق مەكەمەلەردىڭ ماماندارمەن جانە جابدىقتارمەن قامتىلۋىنا قاتىستى سۇراقتار قويىلدى. جەدەل جاردەم، مەكتەپ مەديتسيناسى، بوساندىرۋ قىزمەتى ماسەلەلەرى تالقىلاندى.
جەكە قابىلداۋدا ازاماتتار ەمحاناعا جاتقىزۋدىڭ قولجەتىمدىلىگى جانە شۇعىل مەديتسينالىق كومەكتىڭ ساپاسى بويىنشا پروبلەمالارمەن جۇگىندى. ۆەدومستۆو باسشىسى ءاربىر وتىنىشكە تولىق تۇسىنىكتەمە بەرىپ، ءبىرقاتار ماسەلەلەردى جەكە باقىلاۋعا الىپ، ۆەدومستۆونىڭ بەيىندى دەپارتامەنتتەرى مەن جەرگىلىكتى اتقارۋشى ورگاندارعا قويىلعان ماسەلەلەردى شەشۋدى پىسىقتاۋدى تاپسىردى.