ءجۇز مەترگە جۇگىرۋدەن ۋنيۆەرسيادا تاريحىندا بولماعان ناتيجە تىركەلدى

استانا. قازاقپارات - چىڭدۋدا (قىتاي) ءوتىپ جاتقان جازعى ۋنيۆەرسيادا ويىندارىندا سپورت جانكۇيەرلەرى كۇتپەگەن انتيرەكورد تىركەلدى.
None

100 مەترگە جۇگىرۋدەن ايەلدەر اراسىنداعى باسەكەدە سوماليلىك سپورتشىنىڭ ناتيجەسى كوپشىلىكتى تاڭعالدىردى.

جارىسقا قاتىسقان ناسىر ءالي ابۋكار مارە سىزىعىنا بارىنەن كەش كەلدى. ول 100 مەتردى 21,81 سەكۋندتا جۇگىرىپ ءوتتى. جارىس جەڭىمپازىنان 10 سەكۋندقا قالىپ قويعان.

Fox Sports اقپاراتى بويىنشا، بۇل ۋنيۆەرسيادا تاريحىندا بولماعان ناتيجە. سالىستىرا قارايتىن بولساق، ايەلدەر اراسىنداعى الەم رەكوردى 10,49 سەكۋندتى قۇرايدى، ال ستۋدەنتتەر اراسىنداعى ۇزدىك ناتيجە - 11 سەكۋند.

جارىستىڭ ۆيدەوسى ينتەرنەتتە جىلدام تارادى. ودان 20 جاستاعى سوماليلىك قاتىسۋشىنىڭ جۇگىرۋ سپورتىنان حابارى از، فيزيكالىق دايىندىعى جوق ەكەنىن انىق بايقاۋعا بولادى. ءتىپتى، جارىس الدىندا قالاي دايىندالۋ كەرەگىن دە قارسىلاستارىنا قاراپ باعدارلايدى. ال كوپشىلىك ونىڭ وسىنداي ءىرى حالىقارالىق جارىسقا قاتىسۋ قۇقىعىنا يە بولعانىنا اڭ- تاڭ.

اتالعان وقيعادان كەيىن ءسوماليدىڭ سپورت ءمينيسترى باررە موحامۋد كوپشىلىك الدىندا كەشىرىم سۇرادى. سونداي-اق ەلدىڭ جەڭىل اتلەتيكا فەدەراتسياسى باسشىسىن قىزمەتىنەن بوساتقانىن حابارلادى. كەي باسىلىمدار جارىسقا قاتىسقان ناسىر ءالي ابۋكاردى سوماليدەگى بەلگىلى شەنەۋنىكتىڭ جيەنى ەكەنىن جازۋدا.

سوماليدەگى ۋنيۆەرسيتەتتەر وداعى قىتايداعى ۋنيۆەرسيادا ويىندارىنا ارنايى سپورتشى جىبەرمەگەنىن حابارلاعان. سپورت ءمينيسترى دە بۇعان قاتىسى جوقتارىن مالىمدەگەن. ونى موگاديشوداعى ۋنيۆەرسيتەتتەردىڭ ءبىرى قاتىستىرعان، - دەپ جازادى Somali Times.

سوڭعى جاڭالىقتار