نۋريددين ازيزي اۋعانستاننىڭ سىرتقى ساياساتى نەگە نەگىزدەلگەنىن ايتتى
بۇل تۋرالى اۋعانستاننىڭ ونەركاسىپ جانە ساۋدا ءمينيسترى نۋريددين ازيزي ايتتى، دەپ حابارلايدى قازاقپارات ءتىلشىسى.
«اۋعانستان حالقى مەن ۇكىمەتى ايماقتىق ىنتىماقتاستىقتى دامىتۋعا جانە اۋعانستاننىڭ مۇمكىندىكتەرىن پايدالانۋعا بەل بۋىپ، گۇلدەنگەن جانە ءوزىن- ءوزى قامتاماسىز ەتەتىن ەل بولا الادى. بۇل مىندەت ءبىزدىڭ ۇكىمەت پەن حالىقتىڭ كوپ ەڭبەگى مەن كۇش- جىگەرىن قاجەت ەتەدى»، - دەدى نۋريددين ازيزي استانادا وتكەن بيزنەس فورۋمدا.
ول اۋعانستاننىڭ قىسقا ۋاقىتتا ساۋدا، ترانزيت جانە ينۆەستيتسيا سەكىلدى ءتۇرلى سالاداعى ەكىجاقتى جانە وڭىرلىك ءوزارا ءىس-قيمىلدارعا بەلسەندى قاتىسا العانىن اتاپ ءوتتى.
سپيكەر بۇل كەزدەسۋ ەكىجاقتى ساۋدا، ترانزيتتىك جانە ينۆەستيتسيالىق كەلىسىمدەر جاساۋ، اۋعانستان، قازاقستان جانە رەسەي فەدەراتسياسى اراسىندا ساۋدا جانە ترانزيت تۋرالى ءۇشجاقتى كەلىسىمدەر جاساۋ ارقىلى وڭىرلىك قاتىناستاردىڭ ارتۋى مەن دامۋىنا باستاما بولارىنا ءۇمىت ءبىلدىردى.
«وسى مۇمكىندىكتى پايدالانىپ، اۋعانستان يسلام امىرلىگىنىڭ سىرتقى ساياساتى ايماقتىق ينتەگراتسياعا، ەكونوميكالىق جانە ساۋدا ىنتىماقتاستىعىنا نەگىزدەلگەن تاۋەلسىز، تەڭدەستىرىلگەن جانە ەكونوميكاعا باعىتتالعان ساياسات ەكەنىن مالىمدەگىم كەلەدى. جانە بارلىق اۋعانستان ۆەدومستۆولارى وسى ماقساتقا جەتۋ ءۇشىن ۇزدىكسىز ەڭبەك ەتۋگە دايىن. تاريحتا اۋعانستان مادەني جانە كوممەرتسيالىق الماسۋ قاقپاسى بولدى، ال ءقازىر اۋعانستان ۇكىمەتى جەكە سەكتورمەن تىعىز ىنتىماقتاستىقتا اۋعانستاننىڭ حالىقارالىق، ايماقتىق جانە جاھاندىق ىسكەرلىك كەزدەسۋلەرگە، كورمەلەرگە قاتىسۋ ارقىلى بۇرىنعىدان دا ماڭىزدى ءرول اتقارۋىنا ۇمتىلۋدا»، - دەدى اۋعانستاندىق مينيستر.
ن. ازيزي اۋعانستاننىڭ گەوەكونوميكالىق جاعدايى اۋعانستان مەن ايماقتىڭ يگىلىگى ءۇشىن ءتيىمدى پايدالانىلادى دەپ ۇمىتتەنەدى.
«اۋە ءدالىزىن قۇرۋ، ەكى ەل اۋماعىندا بانكتەرىمىزدىڭ وكىلدىكتەرىن اشۋ، كاسىپكەرلەر ءۇشىن ۆيزا بەرۋ پۋنكتتەرىن قۇرۋ، ىسكەرلىك كەزدەسۋلەر، كورمەلەر مەن كونفەرەنتسيالار وتكىزۋ، ورتاق كەڭىستىك قۇرۋ، قازاقستانعا جۇك تاسىمالداۋ مەرزىمدەرىن قىسقارتۋ جانە قازاقستان رەسپۋبليكاسىنان ساۋدا مەن ترانزيت كەدەرگىلەرىن جويۋ بۇل ماسەلەنى شىندىققا جاقىنداتادى. ءبىزدىڭ ويىمىزشا، كوپتەگەن ەلدەگى ادامداردىڭ ەكونوميكالىق ءوسۋى مەن ءومىر ءسۇرۋ ساپاسىن ارتتىرۋدىڭ ماڭىزدى سەبەبى ولاردىڭ ونەركاسىپتىك دامۋىنا بايلانىستى. وسى سەكتوردىڭ ماڭىزدىلىعىن تۇسىنە وتىرىپ، اۋعانستاننىڭ ونەركاسىپ جانە ساۋدا مينيسترلىگى ونىڭ ارتتىرۋدى ءوز باسىمدىعىنا اينالدىردى»، - دەدى نۋريددين ازيزي.
