تاعى ءبىر ەلدە قاسيەتتى قۇران كىتابىن قورلاۋ اكتسياسى ءوتتى

سارسەنبى كۇنى «Danske Patrioter» انتيسلامدىق جانە ۋلتراۇلتشىل توبىنىڭ (دات پاتريوتتارى) مۇشەلەرى كوپەنگاگەندە مۇسىلمانداردىڭ قاسيەتتى كىتابىنا قارسى ارانداتۋ جاسادى.
ارانداتۋشىلار توبى يسلام دىنىنە ءتىل تيگىزەتىن سوزدەردى ۇرانداتىپ، كەيىن كوپەنگاگەندەگى تۇركيا ەلشىلىگى عيماراتىنىڭ الدىندا قۇراننىڭ كوشىرمەسىن جاعىپ جىبەردى. ولار يسلامعا قارسى سوزدەر جازىلعان ترانسپارانتتار كوتەرىپ، تۇرىك تاۋارلارىنا بويكوت جاريالاۋعا شاقىردى.
اكتسيا پوليتسەيلەردىڭ باقىلاۋىمەن ءوتتى.
ايتا كەتەيىك، 27-شىلدەدە دانياداعى يراك ەلشىلىگىنىڭ الدىندا قۇران ورتەلگەن بولاتىن. ال 28-شىلدەدە «Danske Patrioter» وڭشىل راديكال توپتىڭ وكىلدەرى كوپەنگاگەندەگى مىسىر مەن تۇركيا ەلشىلىكتەرىنىڭ جانىندا قاسيەتتى كىتاپتى جاعىپ جىبەردى.
ءدال وسىنداي پروۆوكاتسيا شىلدەنىڭ سوڭعى كۇنىندە شۆەتسيادا ءوتتى. پارلامەنت عيماراتىنا جاقىن جەردە يراك ميگرانتتارى سالۆان موميكا مەن سالۆان نادجەم قۇراندى ورتەدى.
قازىر دانيا مەن شۆەتسيا ۇكىمەتتەرى ءسوز جانە پىكىر ەركىندىگى پرينتسيپتەرىن بۇزباي، قۇران مەن وزگە دە ءدىني ماتىندەردى كوپشىلىك الدىندا جاعۋ اكتسيالارىنا قالايشا تىيىم سالۋعا بولاتىنىن ويلاستىرىپ جاتقانى حابارلاندى. كەيىنگى ۋاقىتتا وسىنداي اكتسيالار اتالعان ەلدەرگە ايتارلىقتاي پروبلەما تۋىنداتىپ وتىر.
قازاقستان پرەزيدەنتى قاسىم-جومارت توقايەۆ ءبىرقاتار ەلدە قۇراندى ورتەۋ اكتىلەرىنە قاتىستى پىكىر ءبىلدىرىپ، مۇنداي وقيعالار جالپىعا ورتاق نورمالارعا قايشى كەلەتىن اكتسيالار رەتىندە ءبىراۋىزدان ايىپتالۋعا تيىستىگىن اتاپ ءوتتى.
ب ۇ ۇ باس اسسامبلەياسى قاسيەتتى كىتاپتاردى قورلاۋعا قاتىستى كەز كەلگەن اكتىلەردى ايىپتايتىن جانە مۇنداي ارەكەتتەردى حالىقارالىق قۇقىق نورمالارىن بۇزۋ دەپ تانيتىن قاۋلى قابىلدادى.
كەيىن ەۋروپا وداعىنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل سارسەنبى كۇنى مۇسىلمانداردىڭ قاسيەتتى كىتابى قۇراننىڭ ورتەلۋىنە قاتىستى مالىمدەمە جاسادى.