شىعىس قازاقستاندا قولا داۋىرىندە ءومىر سۇرگەن ايەلدىڭ قورىمى تابىلدى

استانا. قازاقپارات - ءال- فارابي اتىنداعى قازاق ۇلتتىق ۋنيۆەرسيتەتىنىڭ ارحەولوگيالىق ەكسپەديتسياسى كەمبريدج ۋنيۆەرسيتەتى ماماندارىمەن بىرلەسە قولا جانە ەرتە تەمىر ءداۋىرى ەسكەرتكىشتەرىنە زەرتتەۋ جۇرگىزدى، دەپ حابارلايدى قازاقپارات.

قاز ۇ ۋ ارحەولوگيا، ەتنولوگيا جانە مۋزەولوگيا كافەدراسىنىڭ مەڭگەرۋشىسى رينات جۇماتايەۆ جەتەكشىلىك ەتكەن قازبا جۇمىستارى شىعىس قازاقستان وبلىسىنىڭ زايسان اۋدانى اينابۇلاق اۋىلى ماڭىندا جۇرگىزىلدى.

عىلىم جانە جوعارى ءبىلىم مينيسترلىگىنىڭ مالىمەتىنشە، زەرتتەۋ جۇمىسى شىعىس قازاقستان وبلىسى اكىمدىگىنىڭ باعدارلاماسى اياسىندا جاسالدى.

دالالىق جۇمىستار بارىسىندا اينابۇلاق- تەمىرسۋ قورىمىنىڭ تولىق توپوگرافيالىق جوسپارى ءتۇسىرىلىپ، بىرنەشە وبا زەرتتەلدى.

وبالاردىڭ بىرىنەن ايەل ادامنىڭ جەرلەۋ ورنى ارشىلدى.

ونىڭ جانىنان قولادان جاسالعان ۇشتىق پەن ىلگىش، قولا ىدىس، 180 اسىق جانە باقانىڭ بەينەسى بار قولا زات تابىلدى.

سونىمەن بىرگە ەجەلگى ءۇش قونىس ورنى انىقتالدى.

«بارلاۋ كەزىندە شەتەلدىك ماماندارمەن بىرگە مەتال زاتتار، سۇيەكتەر جانە ءقابىر ىشىندەگى توپىراق بويىنشا دالالىق جاعدايدا سىناما الىندى. الداعى ۋاقىتتا تولىققاندى ءپانارالىق زەرتتەۋلەر كەمبريدج ۋنيۆەرسيتەتى زەرتحاناسىندا جالعاسادى»، - دەيدى ەكسپەديتسيا جەتەكشىسى.