استانادا رەيسكە كەشىككەن جولاۋشى ايەل كومپانيا قىزمەتكەرىن بالاعاتتاپ، سوققىلاعان
كەيىن رەيسكە جىبەرۋدى تالاپ ەتكەن ايەل ادام FlyArystan قىزمەتكەرىن بالاعاتتاپ، سوققىلاعان، دەپ حابارلايدى قازاقپارات.
وقيعانىڭ ءمان-جايىن انىقتاۋ بارىسىندا جولاۋشى رەيسكە تىركەلۋ اياقتالعاننان كەيىن كەشىگىپ كەلگەنى، سوندىقتان ۇشاققا وتكىزىلمەگەنى ءمالىم بولدى.
اشۋعا بۋلىققان جولاۋشى تىركەۋ ۇستەلىندەگى اۋىر زاتتاردى تىركەۋ باعاناسىنىڭ ار جاعىندا تۇرعان قىزمەتكەرلەرگە لاقتىرىپ، بالاعات سوزدەر ايتقان.
اۋەكومپانيا وكىلدەرىنىڭ بىرىنە اۋىر دەنە جاراقاتىن سالعان.
قازىرگى ۋاقىتتا اۋەكومپانيا قىزمەتكەرگە بارىنشا قولداۋ كورسەتىپ جاتىر، سونىمەن قاتار دەسترۋكتيۆتى جولاۋشىنى جاۋاپكەرشىلىككە تارتپاقشى.
«اۋەكومپانيا وكىلدەرى ءبىرىنشى كەزەكتە تۇلعا رەتىندە ادامعا قۇرمەتپەن قارايتىن قارىم-قاتىناستا جۇمىس ىستەۋگە قۇقىلى. ولاردىڭ دەنساۋلىعىنا زيان كەلمەۋى ءتيىستى. سوندىقتان، جولاۋشىلاردان ءتارتىپتى بۇزباي، سىيلاستىق تانىتۋدى سۇرايمىز. سونىمەن قاتار، 170 جولاۋشى كەشىگىپ كەلگەن ءبىر ادامدى كۇتە المايتىنىن ەسكەرگەن ءجون. بۇل جاعدايعا قاتىستى جولاۋشى زاڭدى تۇردە جاۋاپكەرشىلىككە تارتىلادى جانە دە اۋەكومپانيا قىزمەتتەرىن پايدالانا المايدى دەگەن سەنىمدەمىز»، - دەدى FlyArystan باسقارۋشى ديرەكتورى ەدريان حاميلتون-ماننس.
كومپانيا رەيسكە ۋاقتىلى كەلۋ ەرەجەسى مەن مەرزىمى قازاقستان زاڭناماسىمەن بەكىتىلگەنىن ەسكە سالدى.
